[Bisik] In coktél la mizik, lé mo ék lémosiyon

(K)OZE DANN BISIK

Baro Bisik lé rouvér dopi lo 31 août pou déziem parti sézon 2024. La sénn Bisik iyér swar té ouvér ankor pou akeuiy (K)ozé. 

Talan tout sort la réponn prézan pou alim la limier i briy andedan lo bann zartis an partaz ek lo publik biynvéyian. Mizik, fonnkér, « stand up », kont… zenn moun é mwin źenn navé pwin triaz dann spektak partazé ek lo kér pandan la swaré.  

Pou anim swaré-là sé la komédiynn Mlinn ék Bertrand Robert lé pasér de relé é amizér an servis rekomandé.

Maloya dann Sin Benwa in patrimwan vivan é biyn vivan ek Jeunesse Bofon. In ti group maloya, bann ti marmay la kour shapoté par Madame Sophie Belim pou l’AREP (L’Association Réunionnaise d’Education Populaire) su Bofon. Apré avwar biyn répété dann kaz Bofon ariv in lér zot la rant dann vouv Bisik pou kraz in maloya i san bon nout teritwar ek nout kiltir. Zénés Bofon lo travay i pay é si falé ankor di néna gayar moun dann kartié-la é zarlor pou alé rodé.

Aster lo kor té sho té otour Ti gars frêle pran posésiyon la sénn pou in kar dér lo rir. Fié pa si son nom ou son fizik lo boug i anvoy du lour, tré lour mém… Li koup, li ash ek umour… shakinn i pran pou son grad san lang de bwa. Ni fumé blan ni lumièr blan pou anons la koulér lo dan blan i ri san modérasiyon in umour nwar san grinsman ek Ti Gars Frêle. Not biyen le nom !

Aprésa Lo Yab Fonnkézér, Larry Dubard la ni fonnkériz la sénn Tanto in teks an fransé tanto in teks an kréol kom pou di la lang napwin lo zo… li di sat li na pou di… li demaiy lo mo anmélé ek son bann santiman é resanti. Lémosiyon té biyen présan.

** Kosa in shoz i shant, i dans, i ri, i plèr tout an mém tan… (K)ozé Bisik marmay ! **

Navé pwin vals an 4 tan mé an 4ém pozisiyon pou pran la mezur la sénn dann zot répértwar séga/ maloya Cocktail Musical ek Rémi su son klavié, Mahé té zoué cajon é la voi Magali,e lo trio du swar la kontinu donn la kadans in swaré ousa lo van té soufl for raménn gayar su podiom Bisik.

Nou shant, nou ri mé (K)ozé la sénn i donn la parol sat i oz. An kontér é « troubadour » averti té ansuit lo tour Beurty Dubar pran posizion dan la sal. L’agrikontér an parmi la publik (manipulé tel bann marionét) la rakont son zistwar su akoz lo shiyn na pwin la parol. Kriké… Kraké… « El maestro » Beurty té dan la plas é à sa plas Bisik in nouvo fwa pou nouri limazinér tel dobwa sou in kari.Kosa in shoz ?

Si soley i lév a lest, si maloya i lev à lest, la nouvel sénn bann umorist peï i lév osi à lest. Annabelle Bouc la kit son Sainte-Rose natal pou angant anou ek son zistwar piknik(isme). El la poz son marmit ék son glasiére lo mo su la sénn Bsik pou fé rir é refléshi ou koman nout tradisiyon i fé rir la boush osi ant son bon koté é son bann travér souvan dé fwa. In lumour arangé a konsomé san modérasiyon i san bon lodér mon péï. In zoli zasiét la blag pou in ti madam a lumour volkanik.

Lo voyaz la kontinué ankor in bout ek le duo Coco ek Doudou… in revizit bann morso isi LaRéniyon ek Moris… Bana nena in lunivér siro domiel ek lo krakan in galabé sou la dan notaman kan zot i fé a zot soss in morso Jacqueline Farreyrol « Z’enfan la misère » Shanté kom jamé pou Coco ek Doudou.

Avan fini la swaré an kabar maloya sé Damien alias Odyssey mont su podiom. Le zénn rapeur apré in lintro an fonnkèr pou rappel (si bezwin ankor) linportans nout lang ek nou kiltir. Mé sé biyn avec son bann morso rap Odyssée i pran lo larz pou navig dann in luniver ou lo frazé é la rytmik i rap konsian. I rap dousman osi kan May-Lee i répond ali a kapéla… Suiv ali marmay !

Maloya… maloya pa…. Maloya… in ti final kom la komansé ék lo bann marmay Jeunesse Bofon… marmay koméla i préfèr zoué maloya plito alé dormi. É li di, é li na pwin tor : maloya lé anou sa…

Maloya pou komansé… maloya pou fini… la boukl lé bouklé pou swaré (K)ozé mwa septanm.

. 

Nartrouv mwa proshin lo 12 oktob pou in nouvo senn ouvér ou avan pou in ot konsér Bisik. 

Mersi Mlinn pou lo kasaz la blag pou anim la swaré.

Mersi bonpé tout sat i rann sa posibl!

Mersi lo bann zartis i zoué lo ze, mersi lo publik i réponn prézan. 

Biynto zot tour ?

Bertrand Robert. 

Merci Bertrand pour ces mots inspirés et sensibles. Merci Mline pour ta générosité et ton humour piquant, merci à tous pour votre présence évidemment et aux artistes pour leurs talents. Quelles belles découvertes ! Merci à nos partenaires sans qui rien ne serait possible, à toute l’équipe du Bisik fidèle au poste et enfin à nos coéquipiers culinaires l’Ilôt Saveurs et ses samoussas et autres savoureuses créations créoles et le Zantac et ses burgers et brochettes originales et délicieuses.

La semaine prochaine, vendredi 20 septembre, avec Jeahy et Mamiso Groove pour une grande « Fety Gasy » ! Entre Salegy et Musiques du Monde les deux artistes nous proposeront un spectacle haut en couleurs aux rythmes de la Grande Île. Une soirée qui promet à nouveau de beaux partages d’émotions à ne pas manquer ! 

Tout le programme ici.