Kabar sosial klub fason (K)ozé la sénn ouvér ousa plézir ét ansanm é partaz son gayar i pran tout son sans. In kari mélanzé lo gou mon péï san bariyér san konpleks san jujman. In publik biynvéyian nouri par bann zartis zénéré zusko bout la nuit guidé par Mline é Bertand su podiom Bisik.
An promié, Madam Gondol la ni rakont anou in zistwar, nout listwar fetnésans nout péï Laréniyon. In personaz koulér larkansiel i sém lésansiel. Isi pa Venise mé isi sé biyn Laréniyon fason Madam Gondole.
Aprésa Nolly ek Molly,de Misié lo sid, la serv anou in zoli doz pa riyn « In doz »zot rap ek in « vibes » koulér 974 reprézant. Nolly ek Molly in rap di kom « Again »…. sa mém nou iyém.
(K)ozé la sénn i réuni demoun… tout kalité demoun pou tout kalité rézon. Ti Yab Zen la sort lao Montvér pou sém su la sénn in muzik rap angazé mé sat i donn lo sourir dann fénwar, sat i léss imaziné in ot demin lé posibl nout tout ansanm. Ti Yab Zen in mizik la pé ék la solidarité pou in boug solér i éklér la sénn ek son sourir transh papay.
Apré soley… zétwal !
Su la pist o zétwal sé in véli biyn lokal ek Cassie Payet alias Kci.payet i viyn shavir lo publik ek son vwa kristalinn ek in kompo ael ou ankor son interprétasiyon Amy Winehouse apre in rapél in publik konki. Ant isi é New York la rout lé prometér pou Kci.payet é son lunivér muzikal.
Retour dan shemin Sin Benwa ek Tao Aimé ek son nouvo tit « Plus Rien » i sort biynto lo 14 su YouTube. Tao la vwa langouré lé rejwinn ansuit par NWH-MEE in zénn manzel ek in grin vwa i donn la mezur é la bel mezur pou in zoli not ék in zoli koulér la mizik su la sénn (K)ozé.
Dan lo gran playlist (K)ozé sé ansuit Lalo Waro fé son retour apré in premié pasaz improvisé fin lané dernière… Lo kou-si Lalo Waro la raménn lé zarm i donn la vi … armé in ek son gitar mé surtou son dé solda muzisiyn à la bass é à la gross késs.
Lalo Waro i mont an « gamme » é i inskri é afirm son lunivér dan le « game » muzikal.
Promié viraz…. Mazigadoraz dann tournan !
Dam dovan kavalié derier… Akoz Bisik ek (K)ozé sé osi bann zoli surpriz é kado just pou lo plézir partazé. Sé otour Audrey K i poz sa vwa ek son bann muzisiyn dann Bisik. In retour o péï natal é dan son vil natal mém. Audrey K an plinn tourné isi la Réniyon i angant lo publik vit sharmé. In publik ousa son famiy, dalon la réponn prézan é la donn la vwa. Lo rest lo publik i konpran vit lo zoli kado zot la pou dékouvér é i rant dann ron, dann vouv kom i di isi. Tout an zénérozité é tel in flanbwayan Audrey K é se muzisiyn i alum in linsandi muzikal ek zot projé K-Loya an dékouvért iyér swar. K-Loya va kontinu fé son rout aswar dimansh dann kartié 3 Lét … Sin lé parkot la ronda Zanpol. K-Loya la fé bri son ‘Fanal » pou fé « Dans maloya » ant isi oubiyn santié « Mafate ». Wouah …! Zador!
Na in dikton, in proverb i di tousél i sa plu vit mé ansanm i sa pli lwin. Delphine, Christine, Remy ek Jean Fabrice i aplik sa o pié la lét ek zot group RÉZILYANS. Guitar, bass, roulèr, »sati, kayanm in mélanz gayar moun ousa la vwa é la mizik i soutiyn inn é lot. RÉZILYANS in mizik i donn la fors, in mizik nouri lo kér é i mont shemin lespwar.
Tizann nout Kèr … Tizann anou ankor é ankor…
Apré la rézilians i ariv lér la bonn ér pou lo group « Tizann nout Kèr » less débordé ankor in pé plis bonér su la sénn Bisik . « Tizann nout kèr »anmené par la vwa Nicolas Renambatz ou sat Gilles Montée o perku é o coeur mé osi ek lakordéon Hervé Cruchon.. In « Tizann nout kèr » i tir sézisman pou donn « Manzé pou lo kér » akoz si lé « Tro tar Baba » mé dan tout lé ka i san bon « Lodér mon péï « . Tizann nout Kèr … Tizann anou ankor é ankor…
Dernié linn drwat, nou tiynbo ansanm pou akeuiy Odyssée. Lé dé ti boug a lalir frél mé In rap kosto é égizé… , in « Flow », dé mo… kadansé, ritmé, i tap, i pét … i fé pass lo mézaz.. pa beswin plis … la mizik i sufi ali-mém. Odyssée i poursui lo voyaz par mer kalm dann vouv Bisik.
Aster la mér lé kalm sé lo duo siro domiel Coco ek Doudou pou pran la bar lo bato Bisik pou aménn anou dann zot luniver repriz é adaptasiyon… notamm sat « Zanfan lé o » ou ankor « Oté la linn ». Ousa bana i sava… bana ral anou ek zot!
Apré avwar otan dansé, shanté, bat la min zot i va biyn bwar in Cocktail… in Cocktail Musical kou-si… Magalie… Remi… Doudou… lé barman muzisiyn i serv anou ek sourir transh papay in gran gorgé a konsomé san modérasiyon zot Cocktail Musical.
Kraźé pilé… ziska tar…
Marmay… marmay… kan na pu néna ankor…. nou fini lo promié swaré 2025 Kozé an maloya dofé ek Zana Maloya… Dofé dann la paiy kann ansanm bana. In publik ou krwa li fatig mé non néna ankor sou talon pou krazé pilé ziska tar. Audrey K i maiy avec pou in maloya gayar… In maloya an déklarasiyon lamour pou di konbiyn nou iyem ali. Nou dékouv maloya Zana Maloya é aster nou iyém ali osi.
Maloya zisko nout la nuit pou dann Vouv Bisik pou léss lo kér kozé pou donn ankor plis la limier lo DiZAN Bisik.
Gayar pa gayar! Té plis ankor. In nouvo Mémorabl swaré… Zartis an talan tout kalité lunivér é zénéré san limit.. in publik biynvéyian, shantér, dansér, batér la min… la ni an poundiak viv sa ansanm nou.
Mersi M’linn pou out bonn umér é kozman biyn plasé pou mét la gam é anim swaré la ek mwin.
Mersi bonpé tout sat la fé anou konfians é sat i rann sa posib inn fwa ankor.
Léss zétwal briyé… n’a shant ann-sou an kér !
Texte Bertrand Robert
Photos Nicolas Renambatz
Contribution bénévole
La semaine prochaine, le samedi 15 février, rendez-vous à la Salle Gramoun Lélé pour la soirée des légendes du folklore réunionnais : Kalou Pilé et Jacqueline Farreyrol.
⚠︎ Cet espace d'échange mis à disposition de nos lectrices et lecteurs ne reflète pas l'avis du média mais ceux des commentateurs. Les commentaires doivent être respectueux des individus et de la loi. Tout commentaire ne respectant pas ceux-ci ne sera pas publié. Consultez nos conditions générales d'utilisation. Vous souhaitez signaler un commentaire abusif, cliquez ici.