Léss lo mo kozé, léss lo kér bat é tambour gazouyé

(K)OZÉ DAN MÉDIATEK : BISIK AN VAVANGAZ…

Bisik an vavangaz la ral la sénn ouvér (K)ozé dann Médiaték Antoine Louis Roussin an Vil Sin Benwa pou in laprémidi partaz gayar ant zartis tout sort univér é in publik biynvéyian é biyn prézan.

Pou rouv lo ron, Berthe la akéuiy lo publik dann patport la médiatek ek son mikro é son vwa an or pou in promié figir séga piké… Dam dovan kavalié dériyér nou lé parti an avan la mizik.

Pou lo déziém viraz sé lo bann dansér Nova Soul (Ness, Elise, Adele, Zoé et et Chelsea) ek #Kersonito et la MJC Saint Benoît la anshénn lé figir dans dann in « free style  » hip hop… In lanshénnman figir an styl i déblok lo rin. 

Banna i fé in promié létalaz zot dans… in pa apré lot… bana i ral anou dan la grann sal léktir ousa lo son hip hop i réveiy inn dé liv andormi. In korégrafi tout an métriz sou lo zié ékarkiyé lo publik la fé lo ron otour ou anlér a létaz pou aprésié shak pa « Nova Soul ».

Aster nou té biyn lansé nou la léss Mickael Maillot du CCCE pou parl anou é lans bann inskripsiyon pou konkour Lo PRI Honoré 2026… In konkour pou tout sat i ékri an kréol… kont, nouvel, fonnkér… Alé gardé su zot sit internet va trouv tout lo bann zinformasioyn.  

Dé mo dékri, dé mo kozé i déliv anou

I koz lo mo kréol lé mié ankor ékouté sat i pé donné in zoli fonnkér… Sé Larry Dubard lo Yab Fonnkézér… Lao su balkon i larg son dé teks é less lo kér fé dans lo mo kou-si.  

Lo yab Fonnkézér li la kozé aster i rest ali pou ekri é anvoy son teks… bana i atann ali.

Lo mikro lé pa tonbé par an o balkon…lé mo i rebondi an léko.

Nicolas Bodlér lo shéf lo mo triplman rekonpansé konkour Pri Honoré kom sorti in létazér la médiatek i pran lo relé pou partaz son fonnkér é in kont o aksan aziatik mé biyn ankré dann son kréolité. Lo tanponé dorizinn i sém lo mo é lo publik i rékolt zot lo zémosiyon.  

Léss lo mo kozé, léss lo kér bat… akoz lo mo napwin triaz dann son manir viv… Sé ankor inn fwa la vwa Eglantine Panizzi i livr anou in teks an fransé ousa la fors son bann mo i dans an dousér é subtilité. Shak mo lé pezé é kalibré… Lo teks i travers i pass de moun an moun ek lénerzi pou rouv lespri… léss pansé é réfleshi su shak mo déklamé…Parle nous encore et encore Eglantine Panizzi….

Lo mo, lo kor, léspri (K)ozé la réponn prézan pou di li lé touzour-là pou fléri ousa i poz ali. 

Suiv anou … ala nou sava… 

Promié parti la fini kan lo publik lé invité a suiv la mizik ziska la sal léshanz la Médiathéque… 

Su la sénn la sal léshanz inn not partenér dann se vavangaz K)ozé : lékol mizik EAMB( Éducation Animation Musicale Benedictin) lé paré pou partaz sanm lo piblik la pran plas dann gradin é dan la sal pou dékouv lo travay lo bann zélév muzisiyn é shantér… Frédéric, Laïna, Nohên, Lisa, Jade, Antoine, Harry, Fabien, Jean Hugues, Florie, Émilie et Emmanuelle.

Bana la prézant anou 5 atelié pou 5 univér … Batri.. gitar… piano… bass… shan… lavé tout sat té fo…Nou la fé lo tour zot travay mé surtou zot mizik siro domiel. Mersi bonpé bana pou lo travay mé osi pou lo gayar partenaria pou se nouvo formul (K)ozé. 

Alé ousa nou vé li suiv anou… é li la ni fé dékouv anou son bann nouvo morso…. Tao Aimé lo ga la vwa siro domiel té biyn prézan… ék son fan klub… lo gar kom dab i donn pou alé…. li lov la mizik é li fann lo lov dann son bann shanson ….Le Lova man sé biyn Tao Aimé…

In talan i apél in ot…

Sé in nouvo zénn talan la mont su podiom Bisik ek Samuel Boyer Vallée… 14 zan é bonpé talan… an anglé ou an kréol version maloya… Samuel i asur an danzéré… « Banger » a lorizon é sé sinié dékouvért (K)ozé la sénn ousa i fo ét… Samuel… a suiv… asuréman…

Rasin la liberté i résonn

Sourir trans papay lékol mizik la Plaine des Palmistes té biyn reprézanté ek son prezidan Mr Alphonsine é Gabriel lo futur prézidan… » i pretan » la larg in zoli ti meddley lo gou ek lodér nout péï… shak morso té in zoli partaz repri an kér par lo publik sou lo sharm… Mon péï ek bana lavé lo gou la mizik an patrimwan partazé… La Plaine i koné shemin astér.. arviyn kan zot i vé…baro lé ouvér…! 

Aprésa trwaziém lékol mizik reprézanté té sat Le Petit Conservatoire de Saint André… Lo quatuor « Nout koulér »… la fé vayaz anou dan zot répertwar lokal, nasional é mém internasional… « Nout koulér » bann zoli not muzik pou in vwayaz musikal « all inclusive »…

Proshin é dernié létap pou lo parkour muzikal nou fé eskal ek « Jazz and Free Roots »… ant dékouvért son nouvo Tit « Zepol  » é lo proshin E.P i ariv tanto… Jazz lo ga la kour… talan à dékouvrir absoluman… zot i pe mém biynto alé tourn ek li son proshin klip… Alé gardé @Jazz Sadiiwhat…. Nou fini an mod dofé dann la pay kann ek Jazz and Free Roots…

Gayar pa gayar… Gayar pa gayar… Gayar… in gayar laprémidi (K)ozé pou in premier vavangaz dann Médiaték Antoine Louis Roussin… 

Mersi bonpé tout zartis la fé anou konfians pou partaz zot gayar… Mersi tout bann lékol muzik la rejwinn anou… é spesialman lékol Eamb in partenér presiéu pou nou dann la médiatek. 

Mersi bonpé lo publik la prêt anou zot zorey, zot lam, zot kér pou viv sa sanm nou…

Mersi la Ville de Saint Benoît et la Médiathéque Antoine Louis Roussin… Mersi bonpé    lo personel pou lakeuiy é zot partisipasiyon… 

Mersi « S »pésial pou tout lékip Bisik la mobiliz azot pou rann sa posibl… ankor in fwa… 

Mersi Bisik pou la konfians… 

Anou nou retrouv mwa proshin pou in nouvo (K)ozé ek ankor dot talan….le 9 mai… mém lieu… mé nou retrouv anou avan mi espèr dann bann konsér Bisik … mod vavangaz aktivé… 

An dalonaz 

Lémo : Bertrand Robert

foto : Iris Mardémoutou