(K)OZÉ, LA SÈN OUVÈR BISIK
Nouvo depar mé touzour ek bann zartis gran talan pou lo retour sénn ouvér Bisik samdi 13 sèptanb o swar.
Nouvo dépar pou inn nouvel arivé dann vouv Bisik. Anabel Feri la rejwin Bertrand Robert pou anim lo (K)ozé. La talantiéz umoris la ni partaz é sourir papay pou mét la zwa an parmi in publik biynvéyian la réponn osi prezan samdi 13 sèptanb o swar.
An promié su la linn dépar sé Miguel Fernández le poèt troubadour. Le poète takin mé pa kokin la pinn anou ek umour é zénérozité in tablo lo mo su lo zonmm ék fanm ant réalité, défo mé touzour an loto derizion é asurans tout risk. La poésie ek Miguel Fernández… fodré plis 4 ti mo pou di tout…
Apres-Li, sé la presk frél, in pé timoré Eglantine Panizzi i pran la lumièr su la sénn Bisik dann in teks su lamour touzour. Eglantine Panizzi la vwa kalm, pozé i delivr sé mo for é dou mé toujour just. Bann mo Eglantine i rézonn an léko an nou publik. Nou tonm dan son pano i di pa stop mé in tablo tou an nuans ant di é non di ant véku é resanti.
Samdi swar té kom in nouvo dépar osi pou Larry Dubard nout fonnkézèr anfin de retour parmi nou (apré in tro lon period san nou). Larry in fonnkér otantik pou in ga vré, sat i anlériz lo mo pou port tout son lémosiyon an souvnans son pepé ek mami. In fonnkér ou lo bann lémosiyon le partazé é asumé par in publik i rekoné li trish pa. Larry se livr é se delivr… nou port ek li lo pwa son fonnkér é léspas in instan nou marsh koté li sanm li si shemin son vi é nout vi.
Apré Lo mo… lé mo an mizik…
Pou rest dann lo mém « vibes » I Seb la ni test in nouvo morso « Linité » . In mesaz linité an reggae… ou in reggae Linité… Indisosiab… Nou la suiv I SEB, li a ral anou su son shemin la pé an atandan in ot fwa dékouv tout son EP.
Linité mé diversité sé sa i fé lo gayar é la fors sénn ouvér.
Astér nou tout té inn, finn tir la ont sé Dj Pickled ek Dj Mcy i mét le faya dann vouv Bisik. Dann in mix zot i fé i sort lo diabl dann kor. Zot mix i fé dans lo kor é sourir lé zespri dann in lanbians soley kadansé é shaloupé.
Aprésa nou gard lo ritm ek bana pou akonpann Meddy i larg dé morso dann micro « A droite, A gauche » é in zoli « Fout bordel « . Kel zoli bordel dann Bisik. Dann vouv i koz, i shant, i dans i viv kom la kaz anoula! Alé di bana anou isi mém pli gayar.
Popopopo! Paré pa paré! Touzour paré ariv lo tour Tao Aimé, lo kalash lover 974. Kom son labitid Tao i zoué son vwa grav ou suav selon… li klak son bann morso an kado. Pa beswin alé lwin pou aprésié… dann la kour mém néna tout!
Kom nou lé dan la kour….nou rest… ek la fors trankil kom Émile… Nou mont sanm li dann « lilet Coco » Sin Benwa … péï ousa soley i lev à la mer… Son morso na lo gou mon péï, loder letshi é bann koulèr lamitié, la famiy otour in bon kari kan soley i pét su la riviér ! Nou apresi e nou redemann la suit … Émile… met ankor na pwin asé…
Fanm dovan kavalié dériyér…
Fanny-Leda ek Amaury Pamraud in duo gitar vwa alias les XY… in son pop rock i navig ant repriz Bon Jovi é kompo kom « I want to fly » ou Fistouk . Fanny ek Amaury i partaz tanto la gitar tanto la vwa mé i partaz sanm nou zot lunivér.
Gayar… pa gayar… gayar… touzour gayar… Kalunéo i pran son tour son plas tout son plas su podiom Bisik pou in « Fon’ker » puisan démosiyon avan klak dé rap tou osi puisan ousa L »Intention » é la « Connexion » i donn lo ritm in frazé i tap dir mé ek in linprésiyon siro domiel-vér i viz just! Sété just é bon kom à la mess du rap biyn estanpiyé 974.
Kan nou pé nou fé… nou la giyn trouv in ti plas an parmi takon zartis iyer swar pou permet KAEL , in ot duo gitar vwa pou de repriz Céline… « On ne change pas » é in indemodabl e kultissim Alain Peters « Rest la maloya ». Xavier zot zanfan lo premié fan la « kifé » kom nout tout!
Bamos! Ola! Como esta?
Si la séñora Chikas Bombas i pran le relé… dirireksiyon Espana… 2 tit’, 2 kompo « Obsédiōn » é « Révélaciōn » . La mizik Chikas Bombas i ral anou su la tér espaniol… Kalienté… Lo rouz son tenu kom lo son son vwa i san bon lo soley ek la fiesta… É biyn dansé mintenan! Lartist fé lo « show » é le pubik i less ali anvouté par son bann norité é son vwa. Oléééé!
Apré l’Espagne direktion la Jamaïque… anfin la mizik Reggae ek Nayjah reggae… Nou rest biyn dan vouv… dann Bisik mé in reggae 974… Lo reggae bana na dé zéfluv in reggae konsian é sat i rapel la lut pou in mond méiyér… pou pa sonbré é rezisté kom zot dernié tit « Apoplexie ». Reggae… unité… debouté… sé Nayjah reggae ! Less la mizik diriz le monde !
In platin shass lot otour Dj Jack pou pran lo kontrol é donn le tempo Mc NAÏA… le beat… lo Flow… Mc NAÏA i pét an flér… Siiv la kadans mém Eminem i perd lér. Pa just lo Flow… le mo MC NAÏA… el taiy é sizél lo mo pou donn la profondér tout sat el shant! Dj Djack i poz lo son a la bonn kadans pou shak parol i klak é rezonn dann vouv Bisik . In mix biyn préparé son bann ansiyn morso é son proshin EP i san bon in rap konsian é angazé ! Kontinu rapé… ankor e touzour.
In dernié pou la rout, in dernié gorjé ek « Cocktail Musical » an mod trio aswar… Claudine ek Magalie o shan é Rémi au klavié… jusko bout la nuit « Cocktail Musical » i donn pou alé … In bouké repriz an zoli zizit pou anbeli ankor plis in biyn gayar swaré.
La linn final lé franshi…. la finn ariv in vie lér… fo nou léss anou pou mié retrouv anou proshin kou.
Mersi bonpé tout zartis la fé anou konfians é gran mersi osi lo publik biynvéyian é kurié la fe lo deplasman pou partaz in gazon la vi, in manzé pou lo kér lespass in swaré (K)ozé …
Gran gran mersi Anabel Feri la rejwinn amwin dann lavantur sénn ouvér ek talan é brio pou anim swaré-là. Gran kér, bon kér, gran talan ek umilité é zénérozité … dann la zwa é la bonn umér.
Mersi bonpé tout lékip Bisik é tout sat i rann sa posib pou lo bann zartis nout Gran Péï La Réniyon.
Nartrouv plis devan… lwin lo zié … pré lo kér !
Lé mo : Bertrand Robert
Lé foto : Nicolas Renambatz
Contributions bénévoles
⚠︎ Cet espace d'échange mis à disposition de nos lectrices et lecteurs ne reflète pas l'avis du média mais ceux des commentateurs. Les commentaires doivent être respectueux des individus et de la loi. Tout commentaire ne respectant pas ceux-ci ne sera pas publié. Consultez nos conditions générales d'utilisation. Vous souhaitez signaler un commentaire abusif, cliquez ici.