(K)OZÉ NOVANM
Akt1… promié figir…
Samdi swar si ti vé biyn mon frér nou la parti bat in karé laba dann vouv Bisik .
Nou la ariv bon ér pou alé laba…
Na asiz na aprésié mon frèr.
Pa bezwin trakakassé atér là navé la plas pou tout demoun…
Sa té gayar..
Navé marmay MJC Saint Benoît ek Sin André pou in kréasiyon ansanm Stéphanie Thazar, in shantéz an or, pou fé lo show ek spektak TFK (Ti fé koi ?). Bana la kdo anou in zoli reprézantasiyon…
La dér…
Aprésa mon frér… nou la mont lao par koté piton Maloya… ek MaloyVibes … (K)ozé mwa novanm té lansé!
Lo son maloya té pét an flér.
MaloyVibes té pou largé…
La kiltir nout péi mon frèr!
Lé bokou réshèrshé…
Nafé lo ron na bat la min ansanm…
Dann vouv roulèr, pikèr, sati té donn lo grin…
Maloya sa mém lo ritm lo kér mon péï .
Sa té gadiamn!
Spektatér i iyém ali…
Oyé ha! Oyé ha!
Mon Lang (K)ozé …
Dann vouv Bisik mon frér… napwin triaz dan nout (K)ozé…
Si la sénn oté zistwar pou la boush ek fonnkèr Prix kou’d Kér Lankréol 2025.ek Nicolas Bodlér la pran lo relé… la donn manzé pou lo kér ! Sa té gadiamn! Oyé ha! Oyé ha!
Spektatér la ni bonpé
La fé plézir anou mon frér.
Miguel a son tour la larg son poézi .
In zouar lo mo ant la malis ék lézérté maiyé ek in parti sanson…
Sa té zoli…
Sa mém nout ti péï…
Ansam nou rir pli for..
Ansanm nou iyém pli for.
Fanm dovan ! Olé !
Fanm mon péï sa lé gabié..
Li néna zoli pou partazé…
Chikas Bombas la ral anou lao.
Lao koté l’espagne…
Son mizik i fé dansé…
Son mizik i ral dann la fèt.
Son mizik latina sa lé zoli.
Nou bat la min pou Chikas Bombas…
Oyé ha! Oyé ha !
Sa té gadiam ! Oyé ha ! Oyé ha!
Dan nout kozé néna gayar mon frér.
Kan lo kér i bat for…
Nou fé mont Rezilians ek Christine, Delphine, Rémi ek Fabrice.. su podiom Bisik…
Bana partaz lamour la mizik…
Bana i shant ek lo kér…
Bana i ral anou…
Ansanm zot nou sava…Rézilians….
Sa té gadiam .. komsa mém nou iyem ali…
Oyé ha! Oyé ha!
Talan ek talan…
Nout sénn ouvér dan Bisik.
Navé talan pou partazé…
Aprésa Na mont lao mon frèr….koté labondans…
Na ékout la mizik « Zenfants la kour ».
Marie, Laura ek Nano… la trap zot gitar, cajon…
La ni fann zot zoli shanson…
Talan dan la kour i demann pou levé…
Alon donn la min pou aménn ali lao.
Léss lo kér shanté… sa mém Sin Benwa…
Oyé ha ! Oyé ha! Sa lé gadiamn… oté…!
Marmay i lév nena talan… I zoué piano i donn la vwa.
Elisabeth in ti zénn fiy…la fé anou zoli kado…
Son vwa i fé rév anou…
I donn anou lespwar…
I donn lémosiyon…
Pou agard zétwatl briyé …
Atann soley levé gran matin.
… sa té gadiamn… in zoli vwa …
Sa mém lavnir nout ti péï…
Alor bat la min pou el ankor.
Oyé ha… oyé ha!
Dernie viraz… Semb Lo Kér
Kan na pi néna ankor…
Manzé pou lo kér…
Navé pou partazé ek « Semb lo kér »… Kristof ek son lantouraz pintad…
Bana i donn pou alé…
In son maloya par si…
La mizik mon péï i lév…
Nou bat la min ansanm..
Nou shant ansanm…
« Sanm lo kér » ansanm na gardiyn nout péï .
Oyé ha ! Oyé ha! Sa lééé…gadiamn ! Oyé ha! Oyé ha !
Spektatér la ni bon kér…
Zartis navé gran kér…
Kom sa mém nou iyém dann Bisik…
Nou kass pa la tét nou mét ansanm…
Sa té zoli… zoli (K)ozé !
Oyé ha! Oyé ha !
Sa téeeee… gadiamn… komsa mém nou iyém azot! Oyé ha! Oyé ha !
Mersi bonpé …
In zour si ti ve biyn mon frér…
Ou va ni bat in karé…
Na bat la min ansanm…oyé ha! !
oyé ha!
Gran gran mersi Anabel Feri la anim ankor inn fwa lswaré-là koté mwin ek talan é brio . Gran kér, bon kér, gran talan ek umilité é zénérozité … dann la zwa é la bonn umér.
Mersi bonpé tout lékip Bisik é tout sat i rann sa posib pou lo bann zartis nout Gran Péï La Réniyon.
Nartrouv plis devan… 2026… si bondiyé na pitié! Lwin lo zié … pré lo kér !
lé mo : Bertrand Robert
lé foto : Iris Mardémoutou
Ps: si ou la lir tout… relir aster ek la mizik Filaos.. Bihel Ivoula dan la tét… Zetwal 4ér…
⚠︎ Cet espace d'échange mis à disposition de nos lectrices et lecteurs ne reflète pas l'avis du média mais ceux des commentateurs. Les commentaires doivent être respectueux des individus et de la loi. Tout commentaire ne respectant pas ceux-ci ne sera pas publié. Consultez nos conditions générales d'utilisation. Vous souhaitez signaler un commentaire abusif, cliquez ici.