An mé fé sat i plé aou mé sirtou falé pa raté (K)ozé la sénn ouvér Bisik mwa mé. Touzour an vavangaz nou lété touzour dann Médiaték Antoine Louis Roussin Sin Benwa.
Ankor in kou in takon gayar zartis la zoué le zé pou partaz zot gayar. Promié pou rant dann ron ek son larmonica té Mr Cochard pou akéuiy an mizik spektatér é lo publik la manz in ti gazon manzé pou lo kér.Siflét la boush an min, sourir transh papay… Li la grénn in zoli lanbians pou instal tout demoun pou in laprémidi ranpli surpriz tout koulér.
Aprésa kom in nouvo labitid mé in zoli labitid sé la dans la pran relé ek la dans pilon. Bann danséz maoréz lasosiasyon Niya Moja la partaz ek nou in bout zot kiltir. An koulér é an ritm bana la fé dans pilon. Apré la dans pilon, in zoli kortéz publik la suiv inn é lot bra dsi, bra dsou, ziska la sal lektir ou navé ankor dékouvért pou nouri lam.
Kriké ! Kraké !
Sé Mady Lebeau la pran lo flambo la parol pou in kont « Fanm Koshon ». El la adapt lo zistwar son manir pou gliss lo zistwar an nout dé zorey. Nou la pa fé zorey koshon dann marmit pwa pou léss lo mo kozé, léss lespri vavangé dann limaziner lo kont nout peî.
Pou son promié pasaz dann (K)ozé Mady navé in fwa Nora mi espér ankor dot fwa. Kriké !
Suivé lo guid, lo bal sé par isi…
Lo kortéz la diriz ali ansuit ver la sal léshanz pou lo pla rézistans ek la parti mizik.
Sé dabor Dimitri Fock o sérvis ek son lakordéon avan alé apré zoué pou « Séga Zapaé la pass vwar anou… Li la fé dans anou séga ou ankor vals… Navé pwin marié mé té in zoli moman o son le talantié lakordéonis Dimitri Fock…
Apré li navé la zénn é presk frél Gabrielle alias Gabrielle 97.4 la partaz sanm nou dé tit, son prop kompo , »Viyn » ek « Zwazo ». Alala kado, touzour pa pou lé marié mé pou in publik vitman sou lo sharm. In vwa mazigadoraz, ousa son bann shanson ek lo son son yukulélé la fé plann anou. Inn vwa ant fors é lézerté… ant isi é laba… mé o konbiyn abité dan shak parol shanté. Gabreille 97.4 in zoli talan, in zoli pépit pou sénn ouvér iyér aprémidi.
Ma lavé anonsé kom touzour néna riyn gayar dann sénn ouvér. Sé Tizan’ Nout Kér la repran lo mikro pou fé dékouv anou zot nouvo morso… In nouvo formasion agrandi ek 2 nouvo muzisiyn ousa la plézir ékout banna i grandi avek. Zoli teks, zoli mizik, zoli laranzman pou in zoli pubik osi é la mazi i opér égalman. (K)ozé in pran bann zalur bal zakor lémosiyon i maiy sanm lo mo pou la vwa shakin anlériz in pé plis zot mizik. Bana la Tizan’ Nout Kér ek in boukè shanson té san sitantelman bon.
Maloya… maloya pa… maloya !
Kom in labitid astér… na pwin sénn ouvér Bisik san maloya.
Maloya té sort lwin… Pou rouv lo ron navé Gayar Mélanzé… Sin Lwi té dan la plas… pou zot premié sénn dann St Benwa. Pourtan Bana i fé in ti bout tan lé si la rout mé promié kou i trouv shemin ariv ziska nou. Pou inn premié fwa shé nou… Té in zoli premié fwa… Tradisionél mém… Maloya Dofé dann la paiy kann… dofé su la sénn dann Médiaték Antoine Louis Roussin.
Zot la Donn anou la fors… la fors pou lévé… la fors maloya…la fors nout péï. Gayar Mélanzé pou in gayar maloya.
Aprésa nou kass pa lo ron maloyà… nou gard lo ritm ek Zéness Gayar… 11 maloyér i pran plas su la sénn. Fanm… boug.. marmay…lespri maloyà i réuni bana é lo publik i rant dann ron pou fé pét la kol…
Maloya … maloya… lespri… lo kor lé la mém… maloya i mor pi!
Maloya néna plin resours… maloya i swann…
An linvité surpriz nou la fé inn plas pou fini laprémidi-là ansanm l’association Pilon… Bana i okup é défann bann moun dann malizé… ousa mavouzans la pa épargn azot pou diféran rézon. Maloya térapi…sanm zot ousa iyér zot la maiy zot zistwar personel ansanm bann shan maloya tradisionél pou ekrir é partaz an maloya zot shemin vi é konba. Lémosiyon té for… lo publik la pran é doné an retour sat zot la partaz sanm nou. Pilon ek tout moun i pass dann lasosiasiyon-là, la rejwinn la grand’ famiy Bisik, famiy (K)ozé… Oz mét lo mo sou lo bann mo an doulér…lo bann espwar… Baro la kaz Bisik lé gran ouvér pou akéuiy é partaz sat zot i vé sanm nou.
Mersi bonpé lo publik la prêt anou zot zoréiy, zot lam, zot kér pou viv sa sanm nou…
Mersi la Ville de Saint Benoît et la Médiathéque Antoine Louis Roussin… mersi bonpé lo personel pou lakeuiy é zot partisipasiyon…
Mersi « S »pésial pou tout lékip Bisik la mobiliz azot pou rann sa posibl… ankor in fwa…
Mersi Bisik pou la konfians…
Pou (K)ozé lé fini semestr-là… Nou retrouv mwa 12 septanm 2026 pou la suit lavantur sénn ouvér… lespas dé artis tout sort é piblik kurié é biynvéyian !
Dan tou lé ka nartrouv anou pou lé ot spektak Bisik i kontinu son mod vavangaz !
Nartrouv vitman !
An dalonaz
Bertrand Robert
Photos : © Nicolas Renambatz
⚠︎ Cet espace d'échange mis à disposition de nos lectrices et lecteurs ne reflète pas l'avis du média mais ceux des commentateurs. Les commentaires doivent être respectueux des individus et de la loi. Tout commentaire ne respectant pas ceux-ci ne sera pas publié. Consultez nos conditions générales d'utilisation. Vous souhaitez signaler un commentaire abusif, cliquez ici.