(K)OZÉ, LA SÈN OUVÈR BISIK
Iyer swar kan té komans in pé tar… kan soley té sa dormi é zétwal té pran son plas pou fanaliz la nuit … sé lér pou bann zartis ariv inn apré inn dann vouv Bisik….
Navé manzé pou lo kér ….lespri.. lam… iyér swar dann (K)ozé la sénn ouvér Bisik.
Pou alim dofé sou marmit navé Anabel Feri ek Bertrand Robert an mét sérémoni la kaz Bisik. Lumour Anabel Féri… « fé rir ».. é lé mo BR o servis bann zartis ek lo publik.
Navé bonpé zinvité kurié é biynvéyian la réponn prézan pou dékouv kel kalité manzé pou lo kér navé pou dégusté.
An promié kom in tir gou sé DJ PICKLED la lans la swré ek in set Dj la soufl su la bréz pou fé mont la tanpératur ek in mix té grinn dofé. Ni inn ni dé publik la rant dann ron sourir trash papay pou dansé… pou aprésié kom la kaz!
Aprésa té otour la ti jénn Maurannd fé dékouv son pla manzé. In zoli vwa klér kom dolo lo rosh pou in zoli version « Imagine » i viyn rafréshi out dedan, out léspri kan ou manz out gazon ri. Asuréman la rélev i métriz é i koné osi lo bon manir rajout son grin sél. Marmay la i koné la mizik é mém dansé kan el i shant é kraz in mamoya Tantine Zaza repri an kér par in publik sou lo sharm.
Napwin manzé la Réniyon san rougay. Astér sé Coco ek Doudou lé spésialis revizit musik lokal é oséan indien pran la plas Maurane… la fiy Coco su la sénn Bisik. Zot ti rougay in mélanz vwa- gitar i pouak pa la boush mé i relév shak pla-shanson zot i donn.Dan sé bufé jéan manzé pou lo kor, léspri, lam shak sénn ouvér. Shanté … partazé ek Coco é Doudou… lé touzour in plézir.. .
Dousér…. fonnkér…?
Tank nou lé dan la dousér in ti tir gou ek in fonnkér Larry Dubard. Li na son resét perso… sinsérité é otansité pou in fonnkér ranpli inn fwa ankor lémosiyon… Larry lo shéf kuisto … tradisionél mém… mé touzour é ankor ek lo gou lo kér vaiyan mon péï.
In ti nouvo aswar é sé pa ek son piano mé sé platinn Dj N’CH î ralum lo fé sou marmit pou fé repran la bréz… Lo shiyn fé pa lo shat… Dj N’CH i konfirm lo dikton la jeness i lév i apran vit é i viz touzour pli o , pli vit, pli for… Fé pét lo son dan vouv Bisik…Mét ankor la mizik don…
Kan dofé i pét… sé lo rap DARUMA i klak… Lo son in rap 974 i kondui aou la ousa ou dwa alé. I fé pa sanblan ansanm li… tout lé karé … métrizé… in servis an 3 tan… livré tou konpri… Son…teks… son « flow »… Embalé sé pezé… livré sur le plato!
Ant dé Kozman Anabel Feri ek Bertand i akeuiy é romersi lo bann zinvité… Ansanm bana la fé rir la boush é la donn kado bann biyé pou dékouv bann proshin konsér Bisik
Sé o tour Työs régal anou kan li mont su podiom é serv anou son mizik elekro pop … Inn kuizinn muzikal du mond… nou dékouv é aprési … Napwin triaz dann nout kafé…nou pran…nou goût… nou aprési… Työs le nouvo é biynvenu dan la famiy (K)ozé.
Kan napu nena ankor… sé le tré diskré Vix … si li la fé oubli ali tout la swaré… sé sirman pou mié révél anou son gayar si la fin… la mizik Vix i pass tou sél… in ti gou muzik rap touzour aprésiabl….Dan nou gran repa (K)ozé Vix ek son mizik té le pré-dessert… le ti bonbon sucré i aport in ti gou dou an boush kom not final.
Lo desser….
Aster tout demoun té finn biyn sho é la mayoneź té finn biyn monté sé ZM MALOYA la rejwinn la senn pou lo dessér. Lo son maloya i rezonn for kom in marmit kan i fé shaaaaaa…kan i larg lo kari anndan. Lodér maloya-là la anbom vouv Bisik é la soukouiy lo publik . Tourné… viré… mélanzé. .. Maloya … maloya pa… Touzour maloya ek ZM MALOYA.
Krazé … pilé… mét zepis dann mon pilon… don…
Apré sé gayar kabar lo mo, la mizik tout kalité gou…. fo nou léss anou pou mié retrouv anou proshin kou pou in dernié (K)ozé 2025 ousa nora plin surpriz… shuut… nartrouv vitman pou di azot tout… ou presk…
Mersi bonpé tout zartis la fé anou konfians é gran mersi osi lo publik biynvéyian é kurié la fé lo deplasman pou partaz in gazon la vi, in manzé pou lo kér lespass in swaré (K)ozé …
Gran gran mersi Anabel Feri la anim lswaré-là koté mwin ek talan é brio . Gran kér, bon kér, gran talan ek umilité é zénérozité … dann la zwa é la bonn umér.
Mersi bonpé tout lékip Bisik é tout sat i rann sa posib pou lo bann zartis nout Gran Péï La Réniyon.
Nartrouv plis devan… lwin lo zié … pré lo kér !
Lé mo : Bertrand Robert
Lé foto : Nicolas Renambatz
Contributions bénévoles
La semaine prochaine, Le vendredi 17 octobre, c’est un nouveau Hors-Série Électropicales que nous vous proposons au Bisik avec Savage Mirror et Cappuccinegro! Un plateau 100% urbain où les genres musicaux se mêlent et s’entrechoquent !
Vendredi 17 octobre
Ouverture des portes 19h
Infos / résa au 0693 63 39 39
Entrée 8€ en Prévente Adhérents sur Internet (10€ non adhérents) / 12€ sur place
Buvette et restauration sur place🎟️ Billetterie : https://bisik.re/wj8m
⚠︎ Cet espace d'échange mis à disposition de nos lectrices et lecteurs ne reflète pas l'avis du média mais ceux des commentateurs. Les commentaires doivent être respectueux des individus et de la loi. Tout commentaire ne respectant pas ceux-ci ne sera pas publié. Consultez nos conditions générales d'utilisation. Vous souhaitez signaler un commentaire abusif, cliquez ici.