LA SWARÉ KOZÉ RAKONTÉ PAR LO BISIK
Kom shak swaré Bisik sé Joan’R la mét anou dann lanbians ek son « Set Dj » kalibré pou donn lanvi fé la fêt.
Mé lo mwa mai i komans kom lé zot la komansé par (K)ozé la sénn ouvér dann Bisik é sa i plé anou, i plé azot bonpé!
Napwin (K)ozé san parin…mwa-si sé Sonnkér la parinn lo bann zartis la ni partaz zot gayar sanm nou.
Sonnkér ek Dominique Deniset, Stephane Maillot, David R obert et Dominique Poncharville… kom lo nom i di la fé sonn kayanm, roulér, guitar ek kontrebass o son lo mo… fonnkér an mizik.
Sonnkèr in parin gran kér la fé lév santiman par lo mo an ritm ek la mizik pou lo plézir piblik té aval tout zémosiyon navé dann zot teks. Sonnkèr la rézonn tout la swaré pou donn lo kadans.
Mline ek Bertrand lé zanimatér la suiv lo ritm pou akeiy promié zartis inskri.
Julie Enilorac akonpanié ek son guitar par Nicolas son frèr la fé frisonn lo piblik dé lo bann premié not. La Sinpolwaz i koné par kel bout soukouiy lo piblik lavé dé anvi ankor é ankor san dézakor ek zot prozé mizikal Edmée.
Si fonnkér navé ankor beswin in zavoka pou défann ali… i fo apél Galé Dolo. In ti bout fanm i zoué ek lo mo pou santiman i koné son valér. Ek Galé Dolo fonnkèr i rest in valér sir pou swaré (K) ozé.
Dann (K)ozé néna lo mo sou tout form. Rasta li la ni zoué ek lo mo pou fé rir la boush é romét sourir bor la lév in piblik an or. Apél ali « stand-up » apél ali kasaz lé kui. Dann (K)ozé napwin triaz tou lo lé bon à prann.
(K)ozé i rest in lanbians biynvéyian, in lanbians kamarad, in lanbians ousa napwin bariyér ant domoun.
Sé pa Christian ou Yrlau va dir lo kontrér. Lé 2 dalon Tampon la pa fé la rout pou riyn. Shakinn zot tour zot la fé pét maloya, maloya sat i fé shanté, maloya sat i rakont zistwar la vi, zistwar nout vi.
Nou pé kozé, dansé, shanté zisko bout la nuit é pou sa Anise Catèma té la pou mét in lanbians. Lo zenr lanbians i mét tout domoun dakor. El la fé anou plézir ek son bann repriz.
Marmay néna talan é Lou é Sara lé dé ti zenn fiy la mont anou zot talan ek zot korégrafi su « Snap ». Nou pé kozé ek lo mo mé nou pé osi koz ek la dans.
Larry Dubard la ni in nouvo fwa partaz ek nou son fonnkér. Stephn Maillot nout parin « Sonnkér » la ni akonpann ali su la sénn ek lo son roulér. Akoz sénn ouvér sé la rankont demoun é lo partaz té gayar vwar dé boug’là maiy ansanm.
Nou plé anou osi artrouv pou swaré-là Yannick Lebeau… nou pans li dor li lév ek son giitar dann la min. Li néna biyn rézon akoz son guitar la biyn réponn ali su la senn Bsik . La not la mizik té dou pou aral publik ousa li té vé ménn bana.
Aprésa Skypo lo bénediktin la swaré la rejwinn Yannick pou poz son vwa domiel su in morso li la ékri. Skypo ek Yannick sé in duo i match.
La dernièr fwa nou la krwaz Melyo sé ek son piano… kou-si sé ek son guitar li la ropran ek son laranjman é linterprétasiyon bann gran klasik mizik La Reniyon kom in » cover » Batarsité de Daniel Waro. Melyo i grat son guitar pa pou la fiy du 3ém mé pou nout plézir partazé.
Dann swaré lo tan i fil vit é nou anfil lé dékouvért kom lo bann Perl in kolié i vo tou lor in trésor kashiét.
Matso le peti-ilwa sé in pépit ankor nou la dékouver iyér swar. Son rap, son frazé an kréol sizélé an mélodi i fé bam, bam, bam ou demann aou ousa li sort? Akoz nou ékout ali riyn koméla. Matso néna lo bon mo, lo bon ritm…tard pa tanto li sra pa riyn su la sénn Bisik… mé li lé déza dann lo gran famiy sénn ouvér Bisik pou toultan
Pou fé in kolié nou pé anfil bann Perl kom Matso mé si nou néna in moné an plis nou pé pran in diaman. Lo diaman pou fini swaré-là sé Uma! Uma lé in zoli ti diaman la briy ek son vwa su podiom Bisik akonpanié par Ezly ek son guitar… tout demoun la ékout ael shant son dé morso é kom i di « DANZÉRÉ » lo zafér. Lo fiy i métriz grav ek son dé repriz morso Mayra Andradé ék sat Pix’L … Alé pa tro lwin nou! Uma nou vé antann aou ankor shant pou nou pou bers anou an mizik. UMA lo ti diaman a polir é à dékouvrir san modérasiyon apré in promié sénn réusi é validé.
Dann tout reniyon famiy néna touzour inn i mét lanbians… Dann nout famiy (K)ozé iyér swar Frédéric la fé pét la kol ek 3 ti séga la ansh té kap demann pardon si ou té suiv pa lo ritm. Krazé pilé komsa n’a mém nou iyém ali. Séga Frédéric Dann Bisik la léss lo kor kozé pou nou.
Matso, Uma, Frédéric lé 3 protéjé Dimitri Pitou « Ze mentor » la biyn fé pass vwar anou Sin Benwa é sat té la iyér swar té biyn kontan rankont bana.
Nou la komans la swaré ek nou Dj « rézidan » Joan’R… nou la fini la swaré ek Alejandro le DJ sat lé kap fé pét osi in bon lanbians ( dé fwa osi dé bafl…mdr) avan donn anou randé vous proshin swaré lo 13 mai Salle Gramoun Lélé.
Mersi sat té là ek nou iyér Swar. Mersi bonpé lé parin Sonnkèr ek tout lo bann zartis. Mersi lo piblik i fé anou konfians pou ni dékouv é aprési gayar bana néna.
Mersi Bonpé Mline nout komédiynn milti fasét, milti talan ek in gran sourir la donn la min Bertrand Robert pou fé (K)ozé ek lo mo, la mizik, lo rir , la dans… tout lénerji nésésér… Nartrouv vitman Mline….
« En mai fais ce qu’il te plaît » mé mwa mai fo ni Bisik ankor é toujour… i shap pa…
Ékri : Bertrand Robert
Photos : Iris Mardémoutou
