Sak i spas dann sertin péï Lafrik, i poz kestion. Mi esey aborde le sujé avec prudence é lucidité.
Avec la poussée des BRICS (Brésil, Russie, Inde, Chine et Afrique du Sud) rejoints bientôt par d’autres pays, nous assistons à l’affaiblissement d’une grande partie du monde occidental alliée aux états Unis et son dollar.
Din ot koté, la décolonisation inachevée française et anglaise principalement, i kestione bonpé (les Chagos et les iles éparses pour l’océan Indien) desu le mal-fondé de ces ex puissances coloniales.
Le cas de sertin peï afrikin lé asé particulier. De Gaulle en son temps lavé done le choix de lindépandans ou non pou bann péï ke lété sous son lotorité. In coup de trafalgar kom i di : la blouz bann zafrikin (*). Zot lavé soidizan in sertin lotonomi mé okin pouvoir avec la mise en place bann prézidan konplis !
Zordi le Mali, Burkina Faso ek Niger i vé pi de la Frans, na osi le coup d’Etat au Gabon, la prise de position de l’Algérie, la Chine et la Russie en soutien… riskab dot péï va suiv é nou antan déjà bann martiniké i komans réklam lindépandans.
Bibron la Frans
Isi la Rénion, le mouvman antikolonialis i fé son shemin. La toujour été in sujé central pou bonpé militan, zintelektuèl ek parti politik, mé na bonpé domoun kom mi di toultan i tèt bibron la Frans (y compris sertin zintelektuèl é politisien), é la pa anvi romèt azot an kestion. Eske lindépandans lé anvizazab à la Rénion ? in kestion mi réponnra pa toudsuit.
Dépi lontan dosou lo tapi nou la kashièt bonpé la salté. Okin déba de fon, okin projé pou réyoné, okin consultation de la population. A chaque foi ke na in mouvman la kolèr i pèt (lo pri lésans, la vi shère…), i kas, i briz, i mèt dofé… Aprésa na inndé i trouv in ti plas travay pou fé rès ali trankil, é na inndé i rotrouv ali anndan. Nou fui toultan le problèm, nou règ pa rien ziska lo proshin bèzman. Mi voi pa kel gro dossier la été traité isi apark la distribution larzan piblik. Partou lo dévlopman lé bloké. Nou lé totalman dépandan.
Mwin mi di ke la kestion la souveraineté Lafrik ek le monde multipolaire y konsern anou, poukoué ?
La kolèr bann population afrikin (montée du panafricanisme) é lorganization des BRICS+, va mèt in terme à la domination bann nation monopolistik. Par répercussion, le déclin lé annoncé pou bann population fransé kom pou lérop ou zamérikin. La Frans ke par ailleurs la été bradé é vendu par la makroni va retrouv ali in main dovan, in main dèrièr (oki kom zob !). Pa de sousi pou bann rish é multinationales ek zot larzan planké à létranjé. Lo pèp fransé va serre ankor plis la ceinture et être modeste, le kokoriko va bès din ton, et pétèt ke bann zétranjé va retourn dan zot péï, chacun chez soi.
La souveraineté Lafrik y konsern anou
Mé kosa i devien bann région é téritoir ultra marin, va boir bouyon ek lo rosh ou bien i kontinué mèt la tèt dann sable ?
Lo robiné subvantion va kontinué koulé ou bien ? sov ki pé mé ousa nou sava ?
Eske nou lé prêt pou romèt anou an kestion, rotrouv nout dinité ? eske bann zélu va komans esey dévlop lo péï ou bien va roul anou ankor ? eske nou rojoinn Les Brics via Lafrik ? dan ninport kel ka nou sar gouté mèm !
Dann in kafouyaz anonsé, sakinn va vouloir inpoz son vizion : manèv élektoral, bann fo promès, alarmisme…Dovan in popilation ke i kroi pi an rien ni en persone é ke lé devenu fataliste.
Lé pa sur ke nou va ansorte anou, sak lé sur sé ke si nou pran pa sa en konsidération, nou na ankor pou plèr d’si.
Georges Ah-Tiane pour l’Eko la Ravine
(*) la ruse du Général de Gaulle fût de donner aux Africains l’illusion du pouvoir sans leur en donner vraiment les clés : «C’est une vieille recette blanciste : accorder aux “indigènes” un rôle consultatif, c’est-à-dire dérisoire. Créer des Assemblées solennelles mais sans pouvoir, le “nègre” étant réputé se contenter de palabres passionnées. En l’occurrence, les “nègres” s’appelant Léopold Sédar Senghor, Félix Houphouët-Boigny ou Modibo Keïta, ne furent pas dupes et constatèrent bien vite que ces rares rencontres étaient uniquement décoratives.»
( extrait de Geo histoire, l’Afrique au temps des colonies. Vol24)
