DERNIÉ RÉKOLT 2023
Dernié rékolt 2023 la aport tout son lo zémosiyon. La météo lavé anons anons anou la pli ek zoraz mé sé in pli zartis ek piblik paré pou fé briy la sénn Bisik pou dernié (K)ozé 2023 la réponn prézan.
La pli in vié lézann Sin Benwa mé talan an poundiak sak swaré Kozé in réalité biyn vivan!
Joan’r nout Dj lakaz anou là, la mét piplik dann lanbians ek son platinn pou programasiyon té ariv dériyér.
Lété ékri davans ek El Diablo Miskéo sé dofé dann la paiy kann, bana té pomié pou alim in zétinsel maloya mélanzé ek bann ritm karibéin ou « made in Brasilia ». El diablo mélanzé…melanzé… sa mém lé bon.
Ant la Jamaïque ek Laréniyon sé ansuit Katwaly ek son reggae i fé lo liyn ant nout dé zil. Reggae, routs…Katwaly mém tou sél su podiom i donn pou alé.
I kraz maloya, i dans reggae mé i fé ri la boush osi dann Bisik… Madame Gondole té sort pa Venise mé kartié trwa lét. In personaz koulèr lokal pou fé ri la boush.
Kél ér i lé ? Sé lér pou Ekwé Konect partaz ek lo poblik touzour biynvéyian son electro o gou oriental. Ekwé lo dragon krashéz dofé pou son promié sénn Bisik.
La palm lémosiyon resanti é partazé i reviyn pou Pauline Lauret. Bél Bél son bann repriz ek son Kayanm Zanmari Baré ou sinonsa Grénn Semé.
Pauline nou iyém aou, out vwa, out lémosiyon otantik. Arviyn anou vitman.
Mém Tantine Zaza té la ek nou iyér swar ek Moinache Marie Annick la fé oner ek son zistwar. Lespri, lo kér Tantine Zaza lé la touzour ek nou.
Nou lé biyn dann nout péï é lo group Fred Elie Trio la fé mont anou dann Filao ek astér in sanson lezann Laréniyon sinié Biel Ivoula sinon sa in séga nout kouzin morisiyn. Gayar sanson pou in gayar lanbians dan sinplisité é otansité partazé.
** Fonnkèr. pour nouri lam pou libér lespri é fé viv nout zémosiyon **
Mwa désanm sé lo mwa létshi Bras Canot, kari Bisik, mang, zanana mé pou manzé pou lo kér lavé Fonnkèr. Sat i nouri lam pou libér lespri é fé viv nout zémosiyon.
Zwazo vavangr, Galé Dolo, Larry Dubard ek Anaëlle Latchimy in broshét fonnkézér pou perpetu tradisyon fonnkér dann swaré Bisik. Lo mo pou lo mo… lir ali kom ou vé mé ali mém nout kozé pou lo kér an partaz. Léss lo kér kozé, léss la lang bat akoz kréol partou toultan touzour pli o touzou pli for.
Avan lo final, dé Mamzél, Lou ek Sarah, la fé in ti korégrafi pou di lar i demann zis in plas pou ekzisté pé inport laz é lo lié. Dansé mamzél, léss la dans aport azot, anou la zwa an sinplisité.
Pou lo bouké final sé Heritaz maloya la alim dofé dann farfar Bisik ek in maloya kabaré pou fé plézir in publik ankor in kou biynvéyian é zénéré.
Tout bon koté son lanvér. I ariv in lér fo savwar ferm lo swaré.
Dernié rékolt 2023 la aport tout son lo zémosiyon.
Mersi puplik biynvéyian i viyn dékouv gayar nou néna.
Mersi bann zartis i donn san konté zot gayar.
Mersi Mline pou lané pasé ansanm prézant bann swaré kozé 2023 dann la zwa é moukataz. Nartouv vitman…
Mersi tout sat i donn lamin pou swaré Kozé i viv ankor lontan dann son lespri biynvéyian et dan réspé é partaz san modérasiyon.
Texte : Bertrand Robert
Photos : Iris Mardémoutou
