RACONTÉ PAR LE BISIK
Dan zardin Bisik lo van té souf for mé té pou mié fé rant demoun dann vouv Bisik. Talan su la sénn (K)ozé té grouiy pou serv in manzé pou lo kér, in réspirasiyon pou lam.
Promié pou remont kouran té Hermann Rasendraniaina lo zénn marmay otér, kompositér, interprét la ral anou dan son lunivér. 2 not é in zakor plu tar lo publik lavé suiv son vwa dan la sal tel « le joueur de flûte de Hamelin ». Li la ral son trwa morso à la gitar é instal lumeur lo swaré.
Aprésa pou léss kér kozé sé Florine Jebane in fonnkzézéz. Tél in letshi Bra Kanot dann mwa oktob el la rouv son kér pou mét lo mo su son malizé ant frazilité é rézilians.
« The show must go on » ek Yannick alias KO2MA le boug lé gabié san konplex pou shanté é larg son vérité su 2 tit « Kisa mi lé » an acapella aprésa « Tro sérié « . KO2MA la donn a vwar é antann su la sénn Bisik.
La muzik adousi léspri… é la muzik Cocktail Musical i fé fonn lo kér. Magalie ek son bann muzisiyn la shant an parmi zot séleksiyon in shanson nout regrété Tiloun « Oté mon kafrinn » repri la boush an kér par in publik konésér é sourir transh papay « Oté kafrinn ousa ou va alé n’a suiv aou « . La mizik Cocktail Musical à bwar an siro domiel.
Alimé la limièr… Aksiyon…
Sé Larry Dubard le Yab Fonnkézér i éklér la suit la swaré ek in fonnkér ousa li doz lo mo ek lémosiyon, ousa son vérité i maiy ansanm la not pou detak la lang é less ankor in foi lo ker kozé.
La sénn ouvér sé la bwat shokola surpriz ousa shak artis i viyn néna talan ek in koulér diféran é i léss pa indiféran.
Nova D alias Désirée art arivé tou drwa de Los An Zoseph, nout gran sud, la régal lo publik ek 2 tit son proshin EP i sort biynto « Red Dingue ». Le ti madam pou in premié sénn on diré la fé sa tout sa vi… Le talan la sitantelman pét an flér é konki lé kér demoun in rapel acapella é pa prévu la ashev shavir in publik pou in « big crush » pou Nova D.
Largé lé zamar… Ohé! Ohé matelo! Sé Fred de la Côte ek Dany Merlo ek son lakordeon é Maeva Soa à la bass pou in voyaz ant isi é Mada pou in muzik rock pirate i san bon lé vag musikal i klak kont la kok gitar de Fred le flibustié. Maéva su lo dernié morso i fé in repriz « What’s up, 4 Non Blondes » reprî an léko par un publik bersé par sa vwa. In zoli voyaz le tan in instan ant isi é laba é partou à la fwa.
Si kalbas amér i suiv la rasinn. Lo mo lé biyn anrasiné dann fonnkér Raphaël Bouvon alias Zwazo Vavang’r. In fonnkér « Transzénérasionel » pou in transh la vi an partaz ansanm.
Soley i lév a lest é i dor à loués… fonnkér i lév osi dan louest ek Katy Singainy lo Fanm Ker Maron akonpanié par lo gran Jacky Malbrouck ek son N’Gony. El i bat lo mo sou son shevé koniyé pou son lang kozé pou poz in fonnkér maloya an « Bardzour ». La kord N’gony té ve dans é antan la vwa Jacky Malbrouck rejwin par un ot Jacky. Jacky Martin su cajon. O pié levé anbarké dann lavantur pou iyér swar. La mizik Jacky nou la bwar la koul dan nout zorey é fé bat nout kér.Bondié la kado ali talan pou tir « la plim la mizér » Alain Peters. Tel lo rwa la savann Jacky Malbrouck « Lo lyon » son nouvo morso i rezonn kom in limn pou sov nout savann Sin Pol, nout patrimwan.
Kisa mi lé?
Je suis… Je suis… DCM… Le slameur i arét pa grandir… antouré par Sarah Martin o perku é Anyel David à la bass. Nou koné pa si sè mond lé série mé antouka sé du série ek bana. DCM nou antan out vérité, nou poz pu nou kestion su out travay é out talan. Mé di mwa, di mwa? Nou artrouv vitman?
Lér i pass, lo tan i fil. é apré se lon repa muzikal an parmi la famiy (K)ozé Bisik sé Coco ek Doudou lo déssér… In muzik ek in gou maniok o suk, sinonsa konfitur kambar mov… pou lé plu gourman in bonbon domiel. Bana i ral si zot koukoun la mizik… Ziskatan ? Ziska talér… Zisko bout. ziska soley finn glasé dann Sin Benwa dann vouv Bisik pou fini swaré-là.
Kozé… ozé… kozé… shanté… fonnkérizé… partazé … Nou tir rido pou sénn ouvér mwa oktob…
MERSI tout bann zartis la fé anou konfians, le publik biynvéyian la prêt anou zorey é zot kér lespas in swaré. Nou remersi no dalon Capital Fm Natou Natou ek Patrice Sadeyen lo suiv anou pou partaz la limièr…
Mersi bonpé… bonpé…tout sat i rann sa posibl !
Nou anvoy la fors ek lénerzi sat la pa giyn ét la ék nou iyér swar par zot prézans me lo kér, léspri té là.
Nartrouv azot vitman mwa proshin le 9 novanm pou lo dernié Sénn ouvér (K)ozé 2024. Tard pa tro…
Bertrand Robert
Photos : Nicolas Renambatz
La semaine prochaine, c’est double dose de plaisir avec le vendredi 18 octobre, une véritable vague de révolution qui déferlera sur le Bisik avec le groupe de Luc Moindranzé Saroyé, qui se bat pour faire entendre sa voix dans le concert du monde en mêlant maloya et rumba cubaine. Et le samedi 19 avec l’After des Électropciales en compagnie de Camion Bazar et de Taba ! un moment intense en immersion au cœur de vibrations puissantes !
