(K)ozé, la sèn Bisik mwa novanm
Bisik touzour an mod vavangaz, pou lavan dernié sénn ouvér 2026, (K)ozé la in nouvo kou poz son podiom dann Médiaték Antoine Louis Roussin Sin Benwa.
(K)ozé la sénn zartis an tou zanr é tou orizon ousa lé zartis an reshersh é ou an devenir ou misié, mdam tou’l’mond i pé ni poz son teks, son vwa… fas à in publik touzour biynvéyian.
Sé Ayash lo poèt i lans lo kabar lo zour ek dé teks la mijoté dan son tét, son kor, son léspri tel in bon kari su fé dwa pou déliv in kozé nouri à lam épisé ek sinserité é umilité su somin maron…
Aprésa kom lo talan i demann pa lotorisasiyon pou ekzisté sé la zénn Katlyne la pran a son tour plas gitar à la min pou fé rezonn bann zoli muzik i swann lam é apéz lo kér. not apré not… sé dé premié pa reusi pou set zénn muzisiynn-là. . Publik anganté é paran sourir transh papay… « What else? «
Dan la séri dé première fwa G. Nomade lash ali osi lé premier not sa gitar élektrik pou fe ali plézir é donn plézir lo bann spektatér. Inn min lav lot kom i di… G.Nomade dakor an akor rejwinn la « play list »dé zartist mwa novanm ek brio. Li jou, li shant, li donn, li reswa. le partaz na sa vré dann (K)ozé.


Farfar talan…
La sénn ouver sé osi in lespas pou bann ekol muzik lest. Kou-si sé Le Petit concervatoire de St André la rouv baro pou rejwinn anou in nouvo fwa. Zot la raménn dann zot « besace » fason kdo Noël avan lér… In kér senior kompozé in douzinn shantér pou in version Bosa nova « Grené la pli » mé osi In shantéz Sabrina la repran « From the start » touzour an mod Bosa nova pou gard lo ritm. Pou fini in ti manzel la shant « Hymne à lamour ». In tré, tré zoli moman pou in tré zoli vwa… Té manifaiiik! Pépit an devenir à réantann ankor é ankor asuréman.
Le petit conservatoire, un farfar talan, ousa lo bann amontrér i nouri ek pasion, la mèm pasion la mizik son bann zélév pou nout pli gran bonér é plézir. Le petit concervatoire le farfare gran talan… gran kér… bon kér.

Lé fidèl parmi lé fidèl…
Té fé in ti bout tan bana te pokor ni pass vwar anou, mé lwin lo zié pré lo kér… bana la retrouv shemin…
Coco ek Doudou, lo duo é koupl inséparabl o repriz mé osi aster ek in konpo deklarasiyon lamour… inn dous melodi i fé fonn nout kér kom sa mém mém… Bana i asur é rasur… La mizik té dou kom in bonbon koko ou in ti boudou pou in manzé pou lo kér rafréshisan .


Pou fini sé in pé o pié levé Linne la interprét trwa kompo ael… dé morso reggae « Donn amwin lo tan » , « Shemin la klarté » ék in ti séga « Gravé à zamé » Krazé… pilé… napwin lér pou pran plézir dann zot muzik… Ansanm lo publik nou aprési. Lo gou mon péï ek lodér mon nasiyon .. .
Mersi bonpé lo publik la prêt anou zot zoréiy, zot lam, zot kér pou viv sa sanm nou…
Mersi la Ville de Saint Benoît et la Médiathéque Antoine Louis Roussin… mersi bonpé lo personel pou lakeuiy é zot partisipasiyon…
Mersi « S »pésial pou tout lékip Bisik la mobiliz azot pou rann sa posibl… ankor in fwa…
Mersi Bisik pou la konfians…
Nou retrouv pou la dér…. lo 12 désanm….2026 pou la suit lavantur sénn ouvér…
(K)ozé lespas dé artis tout sort é piblik kurié é biynvéyian !
Mi atann azot pou fé la fét ansanm nou mwa proshin…. Paré? Inskri…
Dan tou lé ka nartrouv anou pou lé zot spektak Bisik i kontinu son mod vavangaz !
Nartrouv vitman !
An dalonaz

Bertrand Robert
Photos ©Nicolas Renambatz


⚠︎ Cet espace d'échange mis à disposition de nos lectrices et lecteurs ne reflète pas l'avis du média mais ceux des commentateurs. Les commentaires doivent être respectueux des individus et de la loi. Tout commentaire ne respectant pas ceux-ci ne sera pas publié. Consultez nos conditions générales d'utilisation. Vous souhaitez signaler un commentaire abusif, cliquez ici.