[Edito] Akoz bande shagossien lé maltrété konmsa ?

Diego Garcia, îles Chagos

JOURNAL TEMOIGNAGES

Mézami yèr soir mwin la rogarde Archipel : l’avé in fime-dokimantèr dsu bannzil Chagos.. Souvan défoi mi di é mwin la pa toussèl kan i anparl lo problèm shagossien –lo drame shagossien-nou rényoné in pé o kouran par raporte lo problème nout kèr i singn.

Pou kossa d’apré zot ?

Sinploman pars ala in pèp loséan indien bande zanglé épi bande zamérikin la rèye azot dsu la karte . San rézon, osinonsa pou in rézon pa rassyonèl . koman in pé partou dann lo monde bande zamérikin néna baz militèr .Néna dann lil Guam, néna dann Okinawa, néna in pé partou demoune landroi néna lo droi rèst koté la baz, travaye dsu la baz, épi gingn zot soso ladan. Néna arienk in pèp la poin so droi-la é sé lo pèp shagoassien .

Shagossien lé pa térorist, zot la zamé larg bonb, i pé pa roprosh azot krime , zot lé pa pli danzéré ké toute pèp néna dsu la tèr , é poitan sé zot ké zanglé épi zamérikin i vé pa oir dann péi zot lé éné é na poin okin rézon valab pou sa.Bande chagos sa in pèp passifik, sa in pèp travayèr, in pèp i manz in nouritir sinp, i zoué séga tanbour é oila sé dsu zot ké la ène bande zanglé épi sète bande zamérikin i tonb.

Na poin okin lozik ladan, la poin arien lé fondé ladan.Tro zantiye, tro poli , tro onète é oila zot déstin dopi par-la sinkante zané.

Mézami kan ni rogarde fime-la, momandoné, dolo i koul dann nout zyé é ni domande , kossa l’ariv anou pou bande goute dolo sorte dann nout zyé.. Défoi mi panss pétète kan l’avé zèsklav laba, l’avé galman zésklav shé nou, kan l’avé zangajé laba, l’avé galman zangajé shé nou mé sa la pa in rézon pour sir.Pé fèr pars zot sé in pèp kréol konm nou lé kréol galman.

Mézami, koman in pèp i pé z’ète maltrèté konmsa ? San rézon valab,san rézon okine .

A bon ékoutèr,salu.

Justin

Quotidien en ligne diffusé en presse-papier jusqu’en 2013 fondée en 1944 par le docteur Raymond Vergès

A propos de l'auteur

Vous pouvez aimer ceci