Lagrikiltir an vil ? In klé pou lotosifizans alimantèr !

agriculture

JOURNAL TEMOIGNAGES

Souvan dé foi mi antan demoune i di ,d’apré zot lotonomi alimantèr pou La Rényon sa sé in n’afèr lé pa possib.Mi pass azot toute kozman mi antan sansa mi lir, dopi lo pri bande zantran, ziska lo pri épi la rarté bande travayèr la tèr, an passan par lanpoizoneman noute tèr lé d’dan é pou anshévé lo tro d’moune pou lo trop ti pé d’tèr .Biensir ni pouré anparl toute bande tèr an frish-plizyèr milyé léktar-mé siréssèrtin sa la pa in largiman pou fé shanj azot diskour .


Mé oila, koméla i parl plizanpliss lagrikiltir dan la vil , pa tro loin oussa lo moune i abite é si ni rogarde oussa i fé sa, nou lé riskab pass dé zour é dé zour, dé nuite é dé nuite é dé nuite a lir pars koméla i komanss an avoir sa in pé partou so zistoir d’lagrikiltir dan la vil.

Oussa i pé trouv sa ?

Par ébzanp dann bande frish indistriyèl .Par ébzanp ankot dsu bande toi, san bande zimèb étidyé spésyalman pou in prodikssyon agrikol dan la vil souvan défoi avèk in randman pli for ké dann lagrikiltir klassik san ansèrv bande produi shimik, san ansèrv langré shimik.

Néna dé foi, wi diré : mé sa i pé fèr ossi issi La Rényon, pou kossa i fé pa ?i pouré plante bande pti léspass avèk in for randman… Mé mwin néna la krintiv ladministrassion fransèz pou son par, èl la pa bézoin zafèr konmsa.

Ankor in foi, nou lé riskab bite dsu kalité règloman lé pa fé pou nou, ziss pou anpèsh anou dévlope lagrikiltir ni vé dévlopé.. Mézami si ni anparlé in pé bande jardin partajé : koméla sa i dévlope in bonpé avèk bande pti léspass mé avèk in bon randman. Mé oila, lo règloman i obliz la pèrsone partaz sak li fé rante zami é sirtou pa vande.

Poitan si li lé vé vande…Va di li réspèk pa lo règloman. Va di li lé kondanab .Konm de koi toute lé fé pou anpèsh la prodikssyon vréman, kissoi la prodikssyon dann vil, kissoi ankor la prodikssyon dann bande kartyé. Mézami noute bande tèks règloman i mérite in bon aproptaz pou gingn aplike azot dann lintéré noute popilassion.

A bon ékoutèr, salu !

Justin

Quotidien en ligne diffusé en presse-papier jusqu’en 2013 fondée en 1944 par le docteur Raymond Vergès

A propos de l'auteur

Vous pouvez aimer ceci