[Bisik] Gramoun la di in salangane i fé pa lo printan…

(K)OZÉ, LA SÈN I ROUV LESPRI, RAKONTÉ PAR LE BISIK

Gramoun la di “dann in ron i rant pa  in karé !” Mé dann réktangl la sénn Bisik nou kapab fé rant bonpé talan zartis ek Bonpé styl pou shak swaré (K)ozé.
Beurthy Dubar ek Bertrand Robert lé passér mikro té fidèl o post pou mét swaré-la an kadans.


Promié pou rant dann ron (réktangl du cou ☺) kom i di té nout parin Eric Naminzo… Eric Véli lo fonnkézér, misiziyn, amontrér… boug milti fasét mé sirtou milti talan, militan, pou zoué ek lo mo sinon lo son. Otantik li la léss lo kér kozé pou grinn son(K)ozé an fonnkér, an shanté lo gou bonbon domiél.

Bann kozé sat i ral aou lézé kan ou marsh si in karé dofé lo mo i fé flanm lo mo kréol dan tout sat li néna pou kado anou. Eric in Veli dann sièl Bisik pou amont shemin le zot zartis té ariv apré.
Bisik i fé i zoli plas lang kréol mé CCEE i mét la limier kom sak ané sat i vé ekri an kréol.
Mickaël Maillot son dirèktèr la ni prézant anou lo konkour Lankréol Daniel Honoré 2023. Ekri, anvoy zot kanditatir pou 2023.. tout lo bann zinfo lé artrouvé su lo sit internet https://ccee.re/.
Gramoun la di in zirondél i fé pa lo printan… mé malgré nout sézon la shalér… pou mark lo printan bann poét… Boquiqueni Laetitia ek Manzusha la ni prézant anou son liv “Le veau d’or” in prézantasion rékréativ. In kari lo mo, zimaz, la mizik ek “Le veau d’or”. Bana la fé in zoli détour pou plant lo dékor su podiom Bisik pou in liv à dékouvrir akoz lé parol i anvol mé lé zékri i rest.
Gramoun la di “lwin lo zie pré lo kér”.
Rudy lo rapér Panoné apré in sertin tan lwin lo zié la retrouv shemin Bisik. Rudy sé kom i di in vié la viéy pou senn ouvér Bisik malgré son zénn laz ankor. Néna lontan li te pokor ni balans son rap tantô an kréol tantôt an fransé perkutan ek lo mo biyn shwazi sur dé son i anvwa du lour. Rudy touzour pli gran touzour pli rap.
Si Rudy sé in marmay sénn ouvér Bisik, Yanncik sé osi in ot marmay Bisik. Yannick la ral dann ron son Dalon Noah ek son piano.
Yannick é Noah sé bann zanfan doué ek son dwa. Shak not, shak kréasiyon i less pa lo publik indiféran. Zot la partaz zot lunivér ek gourmandiz é lo piblik i bwar ek délektasiyon zot néktar mizikal.
Pou mark son laniversér sé NK la kado anou in zouk tou an shiré déshiré mé biyn kadansé kolé séré.
Gramoun la di “ti ash i koup gro bwa” mé ek D.C.M (David Collet Maximin)  sé in vwa, in bass, sél Anyel David, é i koup out lélan alé vwar aiyér mém lo tan bwar in ti zafér o bar. Lo mo lé taiyé pou ant an résonans ek in do plito majeur la bass Anyel. Banm… banm … Tik tik dann kwin… baléiyé lo tan lo 3 morso DCM out lanvi koupé…dékalé mém in ti minit.


Gramoun la di « la mér i bat i anpésh pa ti pwasson dormi »


Déor la pli la mém pa pwint lo bout son né… la pli in lézand bann météorolog konsérnan Sin Benwa… 
Celinn Wadier i pran plas pou shanté… in vwa pou in shanté  mém Baudelaire noré pa di non pou in linvitasiyon o voyaz ” Le monde s’endort Dans une chaude lumière. Là, tout n’est qu’ordre et beauté, luxe, calme et volupté.” Celinn Wadier la fé voyaz spektatér lo tan in parantéz enshanté.
Gramoun B.R la di “fonnkér i ramass pa mentér”. Lari i ramass pa mentér, li ramass pa non pli son fonnkér li préfèr partaz ali ek son lémosiyon kom shak sénn ouvér su podiom Bisik.  La ri mé pa en kér mé Lari an fonnkér an souvnir shakinn son granmér.
Gramoun la di fanm sé lavnir de lomm.
Vanessa Cadar sé pa solman lavenir mé se le talan o prézan sak vwa el i shant in shanson. El i mét tou demoun dakor kom in zakor in mizik. Napwin sirénn pou atir marin dann por Sint Roz mé nena Vanessa Cadar kap fé dompt la mér dann tan syklonn riskab.
Gramoun la di lo shiyn i fé pa lo shat.
Roan Phileas ti zanfan Gramoun Lélé ek son group Tiger maloya i fé ruji rouler, kayanm, sati, lakordéon an traditionnel mém dann in ron maloya su podiom Bisik. Lénerzi zot navé pou partazé ek lo piblik malgré té komans in vié lér. Maloya, maloya pa… maloya i mor pi kom la di gramoun Viry.
Gramoun la di “napwin triaz dann mon kafé”.
Napwin triaz dann Bisik pou sénn ouvér. 
Gramoun la di si néna pou 2 néna pou 10… Reiz in “flow” de “ouf” kom i di lé zenn zan koméla la ferm la sénn si in ritm mém lo diabl i suiv pa. Dofé dann paiy Kann ek Reiz.
Aprésa sé Alejandro in zénn marmay Dj la fé tourn son platinn pou ral lo piblik dann zardin pou fé dans bana kom dann in lanbians an bwat. Balans le son Dj. Le (K)ozé Bisik la fini kom la komansé èk Joan’r Run, dan lanbians, la joi, la gaité… mét ankor la pa sé.
B.R i di partaz lamour zamé larzan. Zartis ek piblik la ékri zot listwar lamour ansanm pou (K)ozé mars 2023.
Piblik la ékri osi pou” la bwat à mo” tout sort kalité kozman B.R ek Beurthy la di pandan ma la swaré mé piblik la ékri osi bann teks su zourné internasional lo drwa fanm nou va partaz ek zot mérkrédi 8 mars 2023 su la Paz Facebook Bisik.
Nartrouv le 1er avril pou proshin sénn ouvér Bisik. Nora ankor zoli pwasson va béké.

Bertrand Robert

Régie : Alexandre Duchemann
Son : Vincent Gerbith
Lumières : Alexandre Jacquot
Photos : Iris Mardemoutou

10 mars : Une soirée 100% rock à ne rater sous aucun prétexte !

La semaine prochaine rejoignez-nous pour le festival Rock à la Buse, délocalisé pour l’occasion dans l’Est au Bisik. Laissez-vous enjôler par le chant de sirène du trio lyonnais Johnnie Carwash qui nous présentera les titres de son nouveau CD “Teenage Ends”; l’accent so british de The Circle-A, et le rock camaradesque de Monoï !

Ouverture des portes 19h

Infos / résa au 0693 63 39 39

Entrée 10€ en Prévente Adhérents sur Internet (12€ non adhérents) / 15€ sur place 

Buvette et restauration sur place

Achetez vos places : https://urlz.fr/kvtv

Chaque contribution publiée sur le média nous semble répondre aux critères élémentaires de respect des personnes et des communautés. Elle reflète l’opinion de son ou ses signataires, pas forcément celle du comité de lecture de Parallèle Sud.

A propos de l'auteur

Kozé libre

A Parallèle Sud nous nous faisons un devoir de libérer la parole, de la partager, sous quelque forme que ce soit (texte, vidéo, son, BD...). Chaque lecteur peut être acteur et créer l'information. Celle-ci est relue par le comité de lecture de Parallèle Sud avant d'être publiée dans la Libre expression.