LOUVERTUR SÉZON RACONTÉ PAR LE BISIK
Soley i lév a lest é swaré (K)ozé samdi 3 févrié la briy ziska tar pou fé lév in piblik an poundiak, kurié é biynvéyian dann la zwa é la bonn imér.
Pou in louvertur nouvo sézon 2024 Bisik lavé mét ti pla dan lé gran.
In » photo call » sinié Fanal fotographie ek lo fotograf é artist Frédéric Pothin té la pou imortaliz bann moman partaz swaré-là… Sourir, foli, jwa, rankont su in foto va rest pou lontan pou pa dir plis dan lé mémwar bann spektatér la ni aprésié lo tan plizier spektak an inn pasé ansanm.
Akoz lo mo lé inportan é domoun i port la mo, i zoué ek lo mo na tout son plas dann swaré (K)ozé Bisik la fé in plas pou Actor Inferno ék « la Guild de l’acting » réunioné. In lantouraz pintad anfin in lantouraz zaktér, aktér debitan ou profésionél, i pouss ansanm pou pran zot plas dann sinéma La Réniyon mé partou ousa lé posibl.
Pou promié swaré (K)ozé zot kapiténn Kenlo Primate lavé donn lo bann zaktér in tém é azot débrouiy azot pou fé viv ali kom zot té vé.
Pandan tout lo premié parti la swaré bana la zoué, improviźé otour bann tém kom » Vandetta, Avec et sans toi, Héritage et avenir, Commérages Airlines, La lampe piégé, Déchirement familial…. Le bonheur… la prise de conscience… ».
Navé tout kalité koulér zémosiyon. Tout kalité lo mo… tan an tan kru, tan an tan drol, déranzan, malézan, kestionan, mé touzour otantik pou shak aktér la rant dann Ron (anfin mont su la sénn Bisik).
La Guilde la mont in bout zot travay é nou atann artrouv azot vitman é souvan su nout zékran sinéma, télé, téat. Gramoun la di lo travay i péiy alor nou souét azot ét biyn péiyé an retour pou sat zot i fé dann in lavnir prosh.
Anaelle, Larry, Abiagaëlle, Anne-Rita, Erika, Melina, Gustin, Fred, Mathilde, Christophe, Daniel, Léa, Manu, Alexandrine, Aurelie, Jeanne, Mélina, Raphaël, Léa… Kenlo… in zoli list lo nom pou in zénérik de fin promié parti (K)ozé 2024.
Lo mo , lo zé mo, lo zé daktér la léss la plas ansuit la mizik su lo mo.
Promié viraz, la mizik dan la po
4 ti mo pa plis pou prézent la sézon ansanm Pascal Saint-Pierre é Mline ék Bertrand i repran micro pour ze cho go on !
Promié pou donn lo tempo té DCM, le rapér, slamér, mé in gran révér i ranpli la paz blansh sou lo son la bass Anyel David pou partaz son lunivér. La mizik i zoué pa ansanm mé i zoué ansanm la mizik riyn la mizik.
Aprésa Jojo et l’Indien in duo Vwa- gitar ousa lo mo i port bann santiman, zistwar vi sat i pé arash aou in kri, inn larm, in kestionman si ou mém. Le duo Jojo et l’ Indien pou inn premié kou Bisik té in kou réusi.
Lo proshin pou mont su la sénn té VZR, le zénn marmay ek son rap sizélé o mo pré i rapel ladaz domin i apartiyn la zéness… azot mém krez zot siyon.
I di kozé i di Fonnkèr é i di depui in bout tan Larry Dubard… apré fé mont anou an premié parti son talan aktér… son talan fonnkézér lé asumé é porté an valér sur si podiom Bisik.
Lo tan i pass é nou vwa domoun i pass su la sénn (K)ozé i grandi i évolu dan zot muzik é zot i pran zot plas tout zot plas. Ruddy alias Ricky Flaco fé parti bann marmay nou vwa grandi depui kelké zané aster. Deriyer son lunét nwar son rap i klak, lé mo travaiyé… napwin riyn san riyn é Ruddy i dékosh in rap, son rap ek élégans é brio.
In rapér i rapèl in otr… otr stil é otr talan dekouvér samdi swar. Théo Schaan alias Migraine… Lo raper « à la flûte traversière » i fé son shemin depui 7 an déjà é son shemin la aménn ali ziska Sin Benwa pou partaz son gayar. Migraine la swann lé mo é son mizik pou angant lo publik Bisik.
Samdi swar kom depui lan dernie sé Mline la komédiyn i donn la réplik Bertrand Robert pou anim swaré (K)ozé. Ant kasaz lé kui é moukataz biynvéyian shakinn i kont lo pwin dan se batay la blag. Mline la amén ranfor ek Loic Techer pou parodi bann shanson é kas lé kui Bertand iyér swar.
Loic a la gitar é Mline o « shan » la fé son tout pou destabiliz Bertrand é mark lo pwin mé navé ni ganian ni perdan zis in bon moman kassaz lé kui.
Si soley i lév a lest…maloya i dwa lév an mém tan
Osi kan la ariv son tour Loic la déléss la parodi muzikal pou inkarn é fé viv son mizik. Loic Técher alias Kipãnga la déplwa son zél pou sérv piblik in mizik i san bon lo soley, i san bon zoli mélodi é in vwa i léss pa indiféran. Kipãnga in talan i dwa kit lo ni é pran son anvol pou partaz son mizik san modérasiyon. Ti papang va ni gran.
An parmi nout bann zabitué néna Cocktail Musical ek Magalie zot shantéz. Mé malerézman dernie minut el la pa pu ét akonpanié par lo bann mizisiyn pri aiyér… Kas ki briz Magalie la pa démont ael é la propoz anou kan mém acapella in tit Sega’el pou lamour la mizik é le partaz ek lo piblik.
Si soley i lév a lest…maloya i dwa lév an mém tan… Mé malgré in vié lér (K)ozé la fini an maloya ek Kaf Tradisiyon in group Sin André la ralim in gran mésh dofé pou di maloya i mor pi… na pwin lér pou dans é shant ali… akoz si maloya té pa là kosa nou noré fé. Kaf Tradisiyon in maloya dann Bisik la rézoné ziska tar pou lo plézir in piblik debout pou in final dofé dann vouv Bisik.
(K)ozé in syklonn ou la mizik i pouss niaz lo mo ousa la mo i pran tout kalité zexpresiyon. (K)ozé shak premié samdi lo mwa néna tout koulér pou tiyn anou an alert.
Mersi tout bann zartis pou zot konfians, Mersi publik i réponn prézan touzour pli nonbré é biynvéyian.
Mersi Mlinn pou out bann kasaz la blag.
Mersi tout sat i rann sa posibl….( Zot Va rekonét azot. ).
Bertrand Robert
