LIBRE EXPRESSION
Lespri, Lo Kèr, Lo Kor Lé La
Si oktob lé roz… la sénn ouvér Bisik (K)ozé la pét an flér kom son flamboyan pou partaz ansanm lo piblik in larkansiel kréasiyon.
Isi La Réniyon oté talan i mank pa! Pou lo publik la lang la démaiyé pou in (K)ozé tout kalité koulèr.
Lémosiyon dann la mizik, fonnkér, « stand-up » é plis ankor la nouri in piblik biynvéyian é aswafé dékouvert.
La komédiynn é umorist Mlinn ek Bertrand Robert la mani lo mikro ant umour, fonnkér, proverb kréol, lo shan é mém la dans’. Bana la mét osi biyn lé zartis kom lo publik à léz pou déroul lo tapi in programasiyon varié.
Numéro un pou lans la swaré sé SLICE BONE. Si lo non i sonn pa lokal mé lo boug le biyn 100% biyn lokal venu du sud… Los An Joseph. Slice Bone pou in zoli « set »de son EP » SUMMER TAPE » . Li la dévwal anou 4 tit’ é sé 4 tit i apel sirman dot pou proshin kou. Lo mizik é lo travay i fé bon ménaz ansanm li. Slice Bone… to be continued…
Nou shant, nou dans mé kréol i iyém biyn fé rir la boush. Pou sa navé David Dubreuil le « stand ‘-uper » lokal ek son zoli shemiz… Sé inn ti nouvo (K)ozé la fé dékrosh la mashwar an zékla rir de li mém. In ti térapi par lo rir ek David Dubreuil lo tan son pasaz i apéz lé zéspri é i fé perd inn de kalori é an mem tan i remét an perspektiv nout kouiyonish intérier.
Fé l’amour pa la gér… Nico Solda lo ti nouvo « number 3 » sé in solda i port biyn luniform dance-hall pou d’vré. Nico i balans in son pou in lanbians tropikal kom nou iyém. Dam devan, kavalié deriyer… an avan la mizik.
Dé trwa i prétan li dor Bisik an kashiét pou ét sir li lé giynn fonnkériz swaré (K)ozé tou lé mwa. I prétan…Zistwar mantér pa mwin lotér! Larry Dubard la pran son plas, tout son plas pou larg sonn fonnkér plin lémosiyon. Larry, sinpl, éfikas i anlériz lo mo pou fé grinn santiman la siynn ek sat spektatér…
Té ékri davans aswar té viyn pa zoué kanét su podiom Bisik pou swaré (K)ozé mwa oktob.
Manzé pou lo kér tou an mizik
Emma Argan té fé pliziér mwa té pokor ni vwar anou… é pou in retour té in zoli retour…
Apré son « single » Kafrinn sorti na dé trwa mwa sa… Emma la arni kou-si ek son bann misiziyn… Winelle, Nicolas, Anthony…in roulér…in guitar… cajon ek perku… la vwa Emma é (K)ozé i shanz dimansion lo tan son dé morso. Alor Kom in gou pa asé Emma i refuz pa la demann son nouvo publik in ot morso… In ti repriz Peters « Rest la Maloya » é i konfirm nou iyém sat el i fé. Lo shiyn i fé pa lo shat. Rest la Emma é arviyn anou vitman.
Mét ankor na pwin asé ! Nou vé ankor… manzé pou lo kér tou an mizik.
David Collet alias DCM ant dé anregistraman Studio akonpanié ek la bass vibrante Aniel David la serv anou 2 zoli galét touzour é ankor sho kom in déssér lo mo subtil é biyn kalibré.
An parmi lé zinskri la sénn pou iyér swar Guila té linvité surpriz la fé anou lo plézir partaz ek nou lo tit son nouvo klip « Désormais » ek in ti bout acapella le proshin i ariv biynto. Guila i donn pou alé é lwazo tiss son ni asuréman.
Aprésa Mika KMZ la débarké ek la fors é la métriz son vwa (mém Joey Starr i giynn pu rivalizé ) é son sourir transh papay naturel. Mika KMZ sé lo bon son Bras Fusil sat i mét lo faya pou anbiansé é fé « kifé » in publik sho brulan in swar débu sézon la shalér dann Sin Benwa.
Kan n’a pu néna ankor… Tao Aimé… lo boug à la vwa siro domiel la konklu swaré iyér swar tou an dousér pou bers anou lantman mé sirman zisko bout la nuit an atandan proshin (K)ozé mwa proshin. Tao Aimé i port biyn son nou la émé é aprésié.
Mersi bonpé lo bann zartis la fé anou konfians…mersi lo piblik kurié é biynvéyian la ni aprési lo bann dékouvért.
Mersi tout sat i rann sa posibl mwa apré mwa.
Mersi Mlinn pou out bonn umér, rir é moukataz biynvéyian pou anim lo swaré. É ankor gayar laz. lo tan i pass… léss ali pasé…
Nartrouv azot vitman ! demin ou in ot zour.
Partaz lamour, zamé larzan !
Bertrand Robert
Chaque contribution publiée sur le média nous semble répondre aux critères élémentaires de respect des personnes et des communautés. Elle reflète l’opinion de son ou ses signataires, pas forcément celle du comité de lecture de Parallèle Sud.
