DEMAIY, LO MO, LESS LO KER KOZE
Randévou té pri dopi biyn lontan pou mwa avril pou swaré (K)ozé kom tout promié samdi shak mwa. Démaiy, lo mo léss lo kér kozé, rakonté, shanté in filosofi pou sénn ouvér dann Bisik dopi bonpé lané aster.
Kom tout mwa iyér swar la shass o pépit té touzour ouvér. Pa beswin permi, ni kashiét dann fon jardin pou régal in piblik biynvéyian é bann zartis zenéré.
Kriké! Kraké ! Navé inn fwa , inn bonn fwa, in madam, Josie Virin la lans pou nou lo bal bann zartis ek son zistwar » Liév i sava bal. » Umour, zénerozité Josie la ral lo publik dann lunivér é lanbians (K)ozé in lanbians partikulié iyér swar dann Bisik.
Tao lo boug diskré mé la vwa siro domiel la rant dann ansuit pou angant lo publik swaré (K)ozé mwa avril. Ek son bann morso Tao lonm o gran kér (malgré in sél bra disponibl iyér swar)ti pa ti pa li fé son shemin li gard lo kap ek son mikro é son vwa pou tras son rout.
Aprésa lo premié kou sho ranpli lémosiyon la arivé ek Florine Jebane ek son bann fonnkér. In mo apré in mo el i partaz son lémosiyon ek in publik de prosh é de mwin prosh. Ant son promié fonnkér » Mon noirsité » an pasan par in poém Victor Hugo « Demain dès l’aube » et pour finir sur in fonnkér » Mon Papa ». Florine i partaz bann transh de vi ranpli lémosioyn mé sirtou el i dévwal sat i fé el.
Florine Jebane son koulér lo kér i ramass pa mentér. Son fonnkér an doulér ou dousér ael mém lotér!
Nou té finn anbarké dann bâto lémosiyon alor nou la kontinuié ek le duo Coco ek Doudou.
Doudou lomm i fé frisonn son gitar pandan Coco i fé rézonn lé parol son bann repriz. Plin sensibilité, dousér, armoni, Coco ek Doudou pou lo plézir shanté i partaz san moderasiyon zot repértwar repriz avan biynto dékouv zot konpo nou espèr…
** Fonnkér an doulér ou dousér **
In duo i shass in ot, kom in bwat shokola surpriz nou akéuiy dé zinvité dernié minut la aksept partaz zot gayar sanm nou. Bernard à la gitar é Jacqueline o shant. Pou in supriz té in bel surpriz… pou in kado té in zoli kado … La vwa Jacqueline i fé dans ankor lé desibel dann mikro é sourir transh papay lo publik prézan iyér swar. Gayar pa gayar! Té tro gayar antann bana !
Na dé retour i fé touzour plézir é lo retour de Sandrine Lallemand su la sénn Bisik nou valid. La fonnkézèz la aksept partaz 2 teks ek nou iyér swar. Sandrine in fanm debout i dress lo mo an fonnkér pou di son 4 verité.
La swaré té dans an lémosiyon iyer swar, in bal bouké ousa bann zartis kom in bouké fler pozé su podiom la anbom lo publik biynvéyian é atantif ek zot lémosiyon partazé dann sat zot la kado anou.
An giz bouké final Guig ‘s an bon mazigador la ansorsél lo publik. Sa vwa, son teks, son kou gitar, son luniver muzikal la angant in publik té dékouv é aprésié shak mo shak not.
Guig’s lo shantér sigidér, sharmér la ankor frapé. Sété sinié Guig’s pou in final ankor plin lémosiyon.
Alé rido… la fin ariv lér kit anou provizwarman pou aswar. Nartrouv vitman pou dot partaz san modérasiyon.
Mersi bonpé Mlinn mon konplis pou anim swaré (K)ozé dann la bonn umér, lo rir, moukataz é biynvéyians touzour.
Bertrand Robert
Vendredi prochain, 12 avril, nous recevons Batkaré et Emma Nona pour une irrésistible soirée péï aux rythmes des kass kass, roulèr et kayamb. L’énergie sera au rendez-vous de cette soirée, c’est sûr ! Venez partager ces moments d’émotions, de sincérité et de connexion pour une ode au maloya inoubliable !
Vendredi 12 avril – Bisik
Ouverture des portes 19h
Infos / résa au 0693 63 39 39
Entrée 8€ en Prévente Adhérents sur Internet (10€ non adhérents) / 12€ sur place
Buvette et restauration sur place
Achetez vos billets en ligne : https://vu.fr/KErK
Régie : Alexandre Duchemann / Maeva Constante
Son : Vincent Gerbith
Lumières : Alexandre Jacquot
Photos : Nicolas Renambatz
