(K)OZÉ DOFÉ, (K)OZÉ LÉMOSIYON, (K)OZÉ SANSASION
En mé fé sat i plé aou mé viyn (K)ozé dann Bisik… Sé sa zot la fé malgré la pli…
Lot swar, samdi pasé, dann vouv Bisik zartis ek domoun té grouiy an poundiak pou ni dékouv programasiyon sénn ouvér Bisik.
La pli té pé gréné tan li vé riyn la arét domoun pou ni pass in bon swaré.
Grand Farid la ni aport son umour, son lénerzi Iyér swar pou anim Kozé ansanm Bertrand. In gro pansé an pasan pou Mline nartrouv vitman an plinn form dan la zwa é la bonn umér.
Pou lans swaré- là iyer navé lo mo porté Michoue Itarre ek Jacques Dumora pou ni fé in lektur sénik zot liv Kréol/ fransé » Si bondié la fé « . In lektur an mizik é dans té donn osi à vwar ek « Nout Compagnie » Cynthia, Julie, Océanie ek Delfine. « Si bondié la fé » in gayar liv a lir, antann, vwar, dansé akonpanié ek in lexpozisiyon skiltur osi. Navé pou tout sans iyer swar ek bana pou donn lélan plato artistik prézan. Zoli tablo vivan pou fé viv nout kiltir…
Aprésa Josie Virin la donn la vwa pou in lomaz Maryse Condé lékrivénn Guadeloupéinn désédé na pwin lontan. In lomaz par lo mo pou un gran madam la litératir franséz. Libéré lo mo, (K)ozé pou sort dann laliénasiyon…in lévidans mém.
Josie in paseź lo mo. El i prépar, donn la parol osi bann zénn la beswin libér azot osi.
La shalèr i mont
Toshe, Tara, Noann, trwa marmay trwa zenn otér la pran kouraz pou ni di zot prop teks, libér lo mo anfouiy anzot, pran zot plas, trouv lamour domoun, partaz zot fonnkèr… an mé lavnir i prépar zordi…
Kan nou iyém nou larg in fonnkér… Dann la famiy fonnkézéz Katy Singainy la arni rann anou vizit ek Estefan zouér N’Goni. In fonnkér an « Fanal fanm » la pa atann « bardzour » pou fé shant lo mo.
Kriké ! Kraké ! Lo mo sou tout form osi ek Larry Dubard lo Yabfonnkézer la ni serv anou in ti kont li la ékri. Li la shass lo bon mo ek son zistwar « Boby papa Tang » kom li di fo pa krwar tout sat demoun i di… Kriké !
Nou koz, nou shant, nou dans, nou rakont zistwar, nou fé koz lo kér… nou la fé ri osi la boush ek Farida Imack inn standupeź la fé pli a nou an dé ek son zistwar biyen tranpé « Tantine lo Port »!
Lo plato te biyn garni pou in zoli lofrann lo publik biynvéyian é an fors prézan samdi swar.
Sé lo moman shwazi par Kci Payet… lo tan la mizik i démar é el anbark anou direk dann in repriz Amy Whinehouse nou vwa defil zetwal tout koulér.… inn blé, inn rouz, in ver… Kci in zoli vwa pou in zoli pépit la ékler la sénn Bisik iyér swar lo tan son 3 morso sa komposisiyon aussi. A suiv tré tré pré…
Alé apré lo ti voyaz dann la pop angleź nou la arni rapel anou nout rasinn ek Famille Maloya… tradisionél mém… Maloya! Maloya pa? Krazé pilé… piblik Bisik i rant dann ron pou Maloya Famille Maloya. Mersi Magalie avwar raménn bana partaz zot gayar sanm nou.
Lo kér i bat for, la shalér i mont sé lasanser émotionél dann vouv… Sitantelman la pli lavé arété personn la fé in kont sanm li.
Pou lémosiyon, voyaz nou pé kont su lo duo Coco ek Doudou la rénn ek lo rwa bann repriz à zot soss bann morso Laréniyon ek Moris pou lo voyaz i arét zamé. Alor an dousér é lémosiyon Coco ek Doudou i bers lo publik lo tan fé redésann la présion.
Kisa la di lo sud i rejwinn pa lest… Arivé tou drwa de Los An Joseph nou bann dalon Slice Bone, Lili Freak ek DRS la fe pét in lanbians rap ek dance-hall 974. Aléwé kisa i reprézant… alé di partou bana té la ek nou iyér swar ! Alééééé!
An mé léss lo kér shanté !
An mé fé sat i plé aou…
DCM lo ti kok à shak sénn son zérgo i afut kom son mo touzour biyn sizélé. Antouré iyér swar ek son éternel dalon Aniel David à la bass ek an plis Larry Dubard su cajon. La vwa, la mizik DCM i pran la fors pou rant dann ron bann zartis i kont touzour plis… touzour lwin… touzour pli for.
A la kdo pou zot… kdo pou nou iyér… dann in swaré san fin pou la bonn koz, la koz l’ar ék la pasiyon…
Sé in zoli lantouraz otour Emma Argan, Camille, Émile, Aniel David, Sara é la talentuez Marcia Higelin i pran posesion la sénn Bisik .
Emma Argan ek Marcia Higelin i partaz ek nou in morso tou nouvo tou sho… ranpli lémosiyon… banna i ral anou i fé lév in publik sou lo sharm. Popopopo… danzéré…
Nou tiynbo nou larg pa … Marcia ek Emma lé rejwin aprésa par Morgan ek Patricia Philippe pou in déziem morso touzour anvoutan tél la mizik bann sirénn bor-mer.
Lo zoli lantouraz pintad i kontinu zot prestasion ek Camille, Emma, Emile, Sara ék Aniel… la vwa tranblan lemosiyon pou lamour ant zot i angant in piblik o premié plas la mazi la mizik bana.
Alé ankor inn dann Bouzaron pou in maloya in repriz Fabrice Legros in shanson Daniel Waro bana i fé shavir anou dann in kaskad lémosiyon lamour siro domiel.
Emma, Camille, Marcia, Émile, Morgan, Sarah, Aniel, Patricia, Dedette… la grande famiy la donn zoli manzé pou lo kér an mizik.
Gayar? Pa gayar? Tro gayar bana la ral anou lao su inn ti nuaz mazik lo tan i suspan son vol!
Nou reviyn in dernié kou sur ter pour akeuiy Zanfan Gayar. Bana bann zenn marmay lavé reprézant lest ék Sin Benwa konkour « Son du bahut 2024 » ék zot maloya apré avwar giyn la demi final Son du Bahut 2024 Bisik. Bana i suiv zot somin maloya. Shemin nout tradisiyon sat la fé dans Bisik iyer swar ziska tar… Zanfan Gayar pou in final dofé an parmi dot zétwal pou Kozé mwa mé.
An mé (K)ozé té dofé pou partaz tout kalité zémosiyon an parmi in publik biynvéyian é zartis zénéré.
Mersi Grand Farid pou la fors son lumour é son lénerzi pou anim ek mwin iyer gayar swaré komsa.
Mersi bann zartis ek lo publik pou lo partaz é la konfians.
Mersi tout sat dann Bisik i rann sa posibl.
Nartrouv vitman pou ankor plis partaz.
Bertrand Robert
Régie : Alexandre Duchemann / Vincent Gerbith
Son : Maeva Constante
Lumières : Alexandre Jacquot
Photos : Iris Mardémoutou
